ВИДЗ-МУ УДЖАЛАН МАШИНАЯС — КРЕСТЬЯНАЛЫ

Мый вӧчӧ та кузя правительство

Миян правительство ӧні ёна зільӧ лӧсьӧдны да сетны крестьяналы видз-му уджалан машинаяс.

Ми ӧткымынлаті та йылысь гижлім нин «Коми Сиктын» (25 №-ын). Тані ми гижам ещӧ на кутшӧм кокньӧдъяс сетӧ правительство крестьяналы видз-му уджалан машинаяс ньӧбӧм вылӧ.

Сӧветскӧй заводъясын видз-му уджалан машинаястӧ локтан воӧ вермасны вӧчны 76 миллион шайт дон. Сэсся ковмас вайны заграничаысь 70 миллион шайт дон гӧгӧр, медым эськӧ крестьяналы тырмасджык.

Доныс машинаяс вылӧ лӧсьӧдчӧ сы ыджда, мыйта сувтӧ заводас сійӧс вӧчӧмыс. Сы вӧсна кутасны зільны чинтыны став мукӧд рӧскодсӧ машинаяс вылӧ: видз-му уджалан кӧлуй складъясысь, мукӧд тӧргӧвӧй рӧскодсӧ. Заграничаысь вайӧм машинаяс вылӧ доныс лоӧ лӧсьӧдӧма сӧветскӧй машинаяс вылӧ моз жӧ. Став сикас машинаяс вылӧ донсӧ юӧртасны таво декабр 1-ӧд лун кежлӧ кымын. Чайтӧны нюжӧдны машинаяс уджӧн сеталан сроксӧ 3−5 пӧв нянь босьтӧмӧдз (урожайӧдз).

Медым эськӧ миян заводъяс вӧчалісны ёнджык да бурджык машинаяс, лӧсьӧдӧма нарошнӧ государственнӧй комиссия. Тайӧ комиссияыс кык тӧлысьӧн видлалас гырысьджык видз-му уджалан машинаяс вӧчалан заводъяссӧ.

Сэсся, медбӧрын, государство лӧсьӧдіс крестьяналы видз-му уджалан машинаяс вылӧ водзвыв гижсялӧм (подписка), сетны крестьяналы машинаяс водзвыв гижсьӧмӧн. Тайӧс лӧсьӧдӧма сы вӧсна, медым государство вермас тӧдны, кутшӧмджык местаясӧ мыйта колӧ видз-му уджалан машинаыс дай кутшӧмджык сійӧ колӧ. Тадзиӧн государство вермас сетны крестьяналы дзик нин налы колан машинаяс.

Водзвыв гижсьӧмӧн машинаяс вылӧ крестьяналы сетсьӧны кокньӧдъяс (льготаяс). Ӧти-кӧ — налы колан машинаыс воас медвойдӧр (в первую очередь), мӧд-кӧ — доныс лоӧ ичӧтджык 1−2 прӧчент мында, коймӧд-кӧ — дырджык кежлӧ мыйкӧ мында уджйӧзсӧ нюжӧдасны. Сэсся гижсигӧн пырысьтӧм-пырсӧ сьӧмсӧ этшаджык кутасны босьтны.

Медбӧръя гижсялан срокъясыс со кутшӧмӧсь: мусинсӧ (почва) уджалан машинаяс вылӧ — январ 1-ӧд лун; нянь босьтан машинаяс вылӧ — март 1-ӧд лун. Водзвыв гижсьысь крестьяналы кутасны сетавны: мусин уджалан машинаяс февраль тӧлыссянь, нянь босьтан машинаяс май тӧлыссянь. Машинаяс вылӧ позьӧ гижсявны видз-му уджалан кӧлуй складъясын, видз-му кооперативъясын.

Водзвыв крестьянаӧн машинаяс вылӧ гижсялӧмыс сетас уна бурсӧ крестьяналы, тшӧтш государстволы. Дерт, крестьяна заводитчасны гижсявны видз-му уджалан машинаяс вылӧ, аслыныс дай сӧвет власьтлы бур вылӧ. Ми надейтчам.