КРЕСТЬЯНАЛЫ АСЛЫНЫС КООПЕРАТИВЪЯСЫСЬ ЭМБУР ЛОТАЙТӦМ БЫРӦДНЫ

Миян обласьтын вель уналаын кооперативъясысь уджалысьясыс тӧварсӧ да сьӧмсӧ лотайтӧны да гусявлӧны. Дерт, тайӧ зэв омӧльтор, зэв ыджыд мыж. Кооперативъясысь эмбур лотайтӧмкӧд колӧ быд ног вермасьны, колӧ дзикӧдз бырӧдны сійӧс.

Мый вӧсна кооперативъясын тшӧкыда овлӧ тӧвар да сьӧм лотайтӧм? Медъёнасӧ со мый вӧсна: омӧль тшӧт нуӧдан уджыс кооперативъясын; шоча видлалӧ уджсӧ инструктор; омӧля видзӧдӧны удж вылас ревизионнӧй комиссияяс да зэв шоча, либӧ кыдзисюрӧ висьтавлӧны шленъяс собранньӧяс вылын удж йывсьыс, сідзи водзӧ.

Медкокниа дай медчорыда кооперативысь эмбур лотайтӧмкӧд вермасьны верман, асьныс кӧ став крестьянаыс босьтчасны кооперация уджын зільны, уджнас тӧдмасьны (интересуйтчыны). Кутшӧм кооперативын правленньӧыс да крестьянаыс кутӧны ёнджыка ас костаныс йитӧд (связь), сэні эмбур лотайтӧмыс оз и овлывлы. Татшӧм кооперативад кӧть уджыс мунӧ омӧля, уджалысьясыс бура оз путьмыны кооперативнас бергӧдлыны, лотайтӧм мыжыс оз паныдасьлывлы.

Кооператив уджӧн крестьяналы колӧ лоны тӧдсаӧн не куш собранньӧяс вылын кывзӧмӧн, колӧ лоны тӧдсаӧн лунысь лунӧ.

Правленньӧыс кӧ кӧсйӧ кутшӧмкӧ ыджыдджык удж нуӧдны, колӧ войдӧр сы йылысь сёрнитны крестьянакӧд — кооперативса шленъяскӧд.

Ревизионнӧй комиссияяслы колӧ вӧчавлывлыны унджык пӧрйӧ ревизияяс да висьтавлыны ревизия йывсьыс собранньӧяс вылын.

Кооперативса правленньӧяслы асланыс став удж йывсьыс колӧ висьтавлыны крестьяналы во пиас кыкысь дай ещӧ кымыныськӧ кутшӧмкӧ торъя уджъясысь. Сэсся собранньӧ йывсьыс крестьяналы колӧ висьтавны водзджык, медым крестьянаыс вермисны думайтыштны сёрни йывсьыс.

Тадзиӧн, ӧти-кӧ, позьӧ вештыны кооперативсьыс эмбур лотайтӧм, мӧд-кӧ — крестьяна матысмасныджык кооператив удж бердӧ.

Кимов Й. А.