КИТАЙЫН ЫДЖЫД ВОЙНА КЫПӦДЧӦ

Пекин. Китайын, юӧръяс серти, позьӧ виччысьны зэв ыджыд гражданскӧй война. Юӧртӧны, паныд пӧ мӧда-мӧдыслы сувтӧмаӧсь генерал Сунь Чуанфань да Янь Сишань. Сунь Чуанфаньыс мунӧ У Пэйфу дор. Янь Сишаньыс зэв тӧдчана (видный) генерал Мукденса армияын. Неважӧн сійӧ вӧлі Чжан Цзолинь штабын начальникын. Сідзкӧ Сунь Чуанфань да Янь Сишань кост косьыс тшӧтш кыскас войнаӧ став армияяссӧ Чжан Цзолиньлысь да У Пэйфулысь. Правительствоыс кыдз-мый вермӧ зільӧ кусӧдны заводитчӧм гражданскӧй войнасӧ.

Неважӧн воліс юӧр генерал Сунь Чуанфань войскаӧн Нанкин кар босьтӧм йылысь. Сы бӧрын босьтӧм йывсьыс некутшӧм юӧр эз лок да сы вӧсна сійӧ юӧрыслы оз позь зэв эскыны. Мукденса войскаяс пыр на бӧрыньтчисны (отступайтісны) косясьтӧг. Мукденса войска ставныс чукӧртчӧны Чинкьян кар гӧгӧр (рытыввылын Нанкин карсянь). Шанхай-Нанкинса кӧрт туй бокын (Нанкинсянь верст 300 сайын кымын) виччысьӧны ён косьяс. Мукденса войска жугӧдлісны кӧрт туй посъяссӧ да лӧсьӧдісны сэтчӧ фронт. Юӧртӧны, Сунь Чуанфань пӧ пыр кутас наступайтны, сӧмын пӧ Нанкин карсӧ босьтігӧн лоӧны зэв ыджыд косьяс.