МЫЙ ВӦЧИМ КОЛЬӦМ ВОЫН

Сентябр 30-ӧд лунӧ помасис 1924−1925 бюджетнӧй во. Октябр 1-ӧд лунсянь пуксис нин выль — 1925−1926ʼ — во.

Быд сӧветскӧй учрежденньӧ, быд тӧргӧвӧй, кӧзяйственнӧй да общественнӧй организацияяс кольӧм воын вӧчисны ыджыд удж — кыпӧдісны ӧтвылысь Сӧвета республикаяс Союзлысь овмӧс, бурмӧдісны оласног.

Быдсяма удж вылӧ пуктӧма уна вын, видзӧма уна сьӧм — во гӧгӧрӧн бергӧдӧма унатор.

Быдсяма удж йылысь колӧ тӧдны миян сӧветса государстволы, колӧ тӧдны тшӧтш уджалысь йӧзлы — рабочӧйяслы да крестьяналы. Колӧ уджсӧ вӧчӧм йылысь отчёт сетны.

Торъя гырысь отчётъяс колӧ сетны сэтшӧм учрежденньӧяссянь да организацияяссянь, кытчӧ уджалысьяссӧ бӧрйылісны йӧзыс — шуам: сӧветъясӧ, кооперативъясӧ, комитетъясӧ, мукӧд пӧлӧс удж нуӧданінъясӧ.

Сӧветъяс — волисполкомъяс, сельсӧветъяс — вогӧгӧрся уджалӧмсьыс отчётсӧ сетӧны выборъяс дырйи став обществоыслы.

Кооперативъяс — правленньӧяс ревизионнӧй комиссияясыскӧд — вогӧгӧрся уджалӧмсьыс лыддьысьӧны кооперативса шленъяс водзын.

Деревняясын тайӧ кык пӧлӧс уджыс — сӧвет да кооператив — медгырысьторъяс.

Сӧветъяс ӧні пӧшти унджыклаын нин бӧрйисны.

Кооперативъяслӧн — потребительскӧй обществоясын — ӧні заводитчӧ выль правленньӧяс бӧрйӧм. Тайӧ уджсӧ нуӧдігӧн кооперативса шленъяслы (крестьяналы) колӧ бура видзӧдлыны, прамӧя сёрнитны докладъяс йывсьыс. Колӧ ӧтвылысь корсьны бурджык туй кооперативлы, медым сійӧ ёнджыка кыптіс, вынсяліс, озырмис, медым тӧварыс лои донтӧмджык, медым тӧварыс вӧлі крестьяналы колана. Сэсся унаысь кооперативъясын овлывлӧны растратаяс. Сыкӧд колӧ быд ногӧн вермасьны, бырӧдны. Медым ревизионнӧй комиссияяс частӧджык видлавлісны правленньӧясыслысь уджъяссӧ, торъя бура сьӧмӧн да тӧварӧн вӧдитчӧмсӧ. Выль правленньӧясад колӧ бӧрйыны тӧлка да веськыд йӧзӧс, медым найӧ сьӧлӧмсяньныс уджалісны обществолы, аслыныс моз жӧ.

Уна удж йылысь колӧ отчётъяс вӧчны ӧні — деревняса учрежденньӧяссянь обласьтувсаясӧдз.

Босьтам кӧ обласьтувса учрежденньӧясӧс, организацияясӧс — найӧ удж йылысь некод на оз тӧд, мый вӧчисны кольӧм вонас. Сы йылысь эськӧ позьӧ жӧ ичӧтикаӧн гижыштны кӧть асланым газетӧ. Шуам кӧть: Обласьтувса Земуправленньӧ нуис во чӧжӧн зэв ыджыд удж крестьянскӧй кӧзяйство бурмӧдӧм понда. А кутшӧм уджъяс (торйӧн-торйӧн) вӧчис, огӧ тӧдӧ. Сідзжӧ и мукӧдъяслысь огӧ тӧдӧ.

Колӧ быдӧнлы лыддьысьны уджалысь йӧз водзын, сетны налы отчёт, да медым вӧлі сэтысь ставыс тыдалӧ ки пыдӧс вывсьыд моз, медым вӧлі быд уджлы лыдпас (цифры). Тӧргӧвӧй организацияяслы колӧ балансъяс, отчётъяс печатайтны.

Кад нин.