ЛӦСЬӦДІСНЫ КЕРӦССА КРЕСТЬЯНА РАДИОСТАНЦИЯ
Сувтіс ставыс 210 шайт
Керӧс сиктын (Кулӧмдін уездын) крестьянаыс Ветошкин ёрт ышӧдӧмӧн юль тӧлысьын Мӧскуаысь корисны аппарат кывзан (
Радиостанциясӧ лӧсьӧдны крестьянаыс заводитісны сентябрын, 23-ӧд лунӧ. Сувтӧдісны кык кузь, 17 саженя, мачтаяс керъясысь, нюжӧдісны на костті сутуга дай нюжӧдісны сутугасӧ керкаӧдзыс, кытчӧ вӧлі лӧсьӧдӧма кывзан аппаратсӧ.
Станциясӧ лӧсьӧдігӧн пӧрысьджык йӧз некыдзи оз вӧлі веритны Мӧскуасянь, сюрс верст сайсянь, сёрни кылӧм. Кымынӧнкӧ весиг шыасьлісны поп дінӧдз: ёна-ӧ нӧ пӧ ыджыд грекыс лоӧ татшӧмторъяссӧ лӧсьӧдӧмысь.
Уджыс муніс кык вежон. Став йӧзыс уджалісны дон босьттӧг. Сувтіс тайӧ станция лӧсьӧдӧмыс 210 шайт.
Эштӧм бӧрас быдӧн вӧлі юасьӧны-сёрнитӧны: кутас оз пӧ мыйкӧ бара кывны. Мӧскуасянь висьталісны лекция видз-му уджалӧм йылысь, мӧда-мӧдлы отсасян комитетъяс йылысь. Сэсся кывзісны му вылын сійӧ луннас лоӧмторъяс йылысь. Кыліс зэв лӧсьыда. Том и, пӧрысь и ёна шензисны.
Керӧсса крестьяна асланыс сьӧм вылӧ лӧсьӧдісны ёна буртор, ассьыныс вежӧрнысӧ югдӧдантор. Мукӧд сиктса крестьяналы колӧ тшӧтш лӧсьӧдны асланыс сиктъясын кывзан радиостанция.
Видзӧдысь.
