ПАРТИЯСА ЯЧЕЙКАЯСӦН КРЕСТЬЯНА ПӦВСТЫН УДЖ НУӦДӦМ ЙЫЛЫСЬ

Тӧв пуксьӧм мысти коммунист партияся ячейкаяслӧн сиктъясын уджыс зэв уна лоӧ: колӧ ыджыд удж нуӧдны ас ячейкаса шленъяс пӧвстас дай ещӧ нин ыджыд удж крестьяна пӧвстын.

Ми тані висьталам сӧмын партияӧн йӧз пӧвстын торъя сёрнияс нуӧдӧм йылысь — кампанньӧяс йылысь. Таво тӧв сиктъясын лоӧ вель уна кампанньӧ нуӧдны. Сэні и сельхозналог мынтӧм йылысь, сэні и Октябрса революциялы 8 во тыран лун, 1905 вося революциялы 20 во тырӧм, декабристъяс йылысь, делегаткаясӧс бӧрйӧм йылысь, сідз водзӧ. Дерт, тайӧ уджсӧ партия ячейкаяслы колӧ нуӧдны бура дай тӧдчӧмӧн, медым крестьянаӧс унджыкӧс кыскыны обществоса уджӧ, медым крестьяналы висьтавны тайӧ лунъяс йылысь дай тӧдмӧдны найӧс партия да сӧвет власьт уджӧн.

Видзӧдлам кӧ ми воддза воясын кампанньӧяс нуӧдӧм удж вылӧ сиктъясын, оз на позь шуны гӧгӧрбок лючкиӧн. Миян уджным вӧлі куш митингуйтӧм. Чукӧртам йӧзӧс собранньӧ вылӧ, агитатор (висьталысь) висьталас йӧзлы зэв вылісянь да ылысянь, мукӧддырйиыс весиг гӧгӧрвотӧм кывъясӧн, йӧзыдлӧн висьталӧмыс пель пырыс петас дай ставыс. Мукӧд агитаторыс сӧмын зільӧны висьтавны, дась лӧсьӧдӧм резолюция тшӧктыны примитны собранньӧлы дай юӧртны партийнӧй комитетӧс: «Праздник муніс бура. Со кутшӧм резолюция примитісны. Йӧзыс вӧлі зэв уна».

Дерт, тадзи кампанньӧястӧ нуӧдӧмысь бурыс зэв этша. Крестьянаыд сӧмын дӧзмӧны. Миянлы водзӧ кежлӧ колӧ эновтчыны куш митингуйтӧмысь. Сы вӧсна кымын позьӧ, сымын колӧ чинтыны кампанньӧяс лыдсӧ. Сэсся оз ков эновтчыны куш висьталӧмӧн лолӧмтор йывсьыс (мыйла да кыдзи лолӧма). Медъёнасӧ кампанньӧяс дырйиыд колӧ висьтавлыны сӧвет власьтӧн да партияӧн сиктъясын ӧнія удж нуӧдӧм йылысь дай кыдзи, код ногӧн колӧ вӧчны сійӧ уджсӧ ас сиктын. Шуам, сӧвет власьт быд ногыс зільӧ да отсалӧ бурмӧдны крестьяналысь кӧзяйствосӧ, тшӧктӧ выль ногӧн видз-му уджавны. Колӧ висьтавлыны, кыдзи сійӧ уджсӧ колӧ да позьӧ сиктад вӧчны. Шуам, сикт бокын эм нюр. Колӧ висьтавны, кыдзи позьӧ сійӧ нюрсӧ косьтыны.

Быд кампанньӧ нуӧдігӧн колӧ сійӧ уджас кыскыны унджык комсомолечӧс, профсоюзса шленъясӧс, делегаткаясӧс, мукӧдӧс.

Сэсся колӧ зільны быд партияса шленлы висьтавлыны крестьяналы колан удж вӧчӧм йылысь, сӧвет власьт да партия удж йылысь не сӧмын кампанньӧяс дырйи, а пыр лунысь лунӧ, колӧ быд шленлы ёнджыка зільны ӧтувтчыны водзмӧстчысь крестьянакӧд, индыны налы уджалан туй.

Эн—пӧ.