ВЦИК-лӧн 2-ӧд СЕССИЯ

Вензьӧм бюджет йылысь

Мӧскуа. Октябр 16-ӧд лунӧ Центральнӧй Исполнительнӧй Комитетлӧн 2-ӧд сессия вылын муніс вензьӧм Левин ёрт доклад кузя (РСФСР-са бюджет йылысь). Волков (Иваново-Вознесенскӧй губерняысь) шуӧ: ӧні пӧ чинтӧны крестьяналысь сельхозналог. Сы бӧрын пӧ колӧ заводитчыны чинтыны косвеннӧй налогъяс. Мануйлов (Смоленскӧй губерняысь) шуӧ: ёна крестьяналы да рабочӧйяслы колан тӧвар вылӧ налог колӧ пуктыны этшаджык. Сы пыдди налогсӧ колӧ унджык пуктыны ковтӧмджык тӧвар вылӧ (на предметы роскоши). Танн (Сталинград губерняувса крестьянин) шуӧ: землеустройство вылӧ пӧ сьӧм уджӧн сетӧны зэв дженьыд срок кежлӧ. Уджйӧз мынтан сроксӧ пӧ сэтысь колӧ нюжӧдны. Сэсся пӧ му-видз тшыкӧдысьяскӧд (сельско-хоз. вредители) водзсасьӧм вылӧ зэв этша лэдзӧма сьӧм. Колӧ пӧ удждыны унджык.

Корилов (Мӧскуаысь) индӧ: уналаын пӧ абу на велалӧмаӧсь нуӧдны ассьыныс уджсӧ план серти. Сессиялы пӧ колӧ быдӧнлы сетны наказ, мед пӧ тавосянь лӧсьӧдасны чорыд бюджет да сы серти и уджаласны. Турупов (Алтайскӧй губерняысь) шуӧ: государство пӧ ӧні оз на вермы лӧсьӧдавны тырмымӧн школаяс да больничаяс. Сы йылысь да мукӧд сэтшӧм коланторъяс йывсьыс пӧ колӧ лӧсьӧдны местаясас ас вынӧн.

Воронцов (Уралысь) висьталіс гӧрдармееч семьяяслы отсалӧм йылысь. На бӧрын сэсся висьталіс Крупская ёрт. Сійӧ индіс: гырысьджык школаясын (2-й ст.) программаясас пӧ зэв этша висьталӧма общественнӧй удж йылысь. Сы йылысь пӧ программаясас колӧ унатор содтыны.

Бӧръя кывйын Левин ёрт висьталіс: бӧръя воясас миян бюджет серти уджалӧм да видлалӧм (контролируйтӧм) сійӧ уджсӧ пыр мунӧ лӧсьыдджыка. Сӧветскӧй государствоын медвойдӧр бюджетсӧ колӧ чорыда лӧсьӧдны увсяньыс, волисполкомъяссянь. Мед волисполкомъяс кутісны уджавны асланыс лӧсьӧдӧм бюджет серти, колӧ бура сувтӧдны ревизионнӧй комиссияясын уджсӧ. Ревизионнӧй комиссияыслы волисполкомъяс кутасны висьтавлыны бюджет серти уджалӧмсӧ. Выліджыкъясас ревизионнӧй комиссиялысь уджсӧ кутас нуны финансӧвӧй контроль.

Левин ёрт висьталӧм бӧрын сессия бӧрйис комиссия 43 мортысь доклад кузя резолюцияяс лӧсьӧдны.

Октябр 17-ӧд лунӧ Юстиция комиссар Курскӧй ёрт висьталіс доклад гӧтрасьӧм йылысь, семья пытшкын олӧм йылысь да опека йылысь выль закон чукӧр серти (проект).