КОДЛӦН МЫЙ ВОШӦМА. — КӦНІ МЫЙ СЮРӦМА

Коми крестьяна!

Тіян унаысь мыйсюрӧ вошлывлӧ: вӧвъяс, мӧсъяс, чаньяс, мукӧдтор. Вошныд ӧд регыд, а корсьныд лоӧ дыр. Шуам кӧть: кутшӧмкӧ Пезмӧгса крестьянинлӧн вӧлыс вошӧма; дядьӧыд мый дыра корсьысяс, кымын лун воштас, да оз и сюр; гашкӧ сылӧн вӧлыс кӧні нин ветлӧ — карын либӧ Пальын, — кыдз сюрас, некод кӧ оз юӧрт. А кыдзи юӧртан бара? Гашкӧ эськӧ кодлыкӧ и шедӧ вӧлыд, да оз тӧд, кодлӧн сійӧ вӧлыс, кодлы кытчӧ колӧ юӧртныс. Унаысь сідз и овлӧ.

«Коми Сикт» газет — крестьяналӧн газетыс. Ми кӧсъям ичӧтик буртор вӧчны коми крестьяналы. Гырысьджык вошӧмторъяс йылысь гижны «Коми Сиктӧ» дон босьттӧг (бесплатно), медым крестьяна вермисны сы серти тӧдмавны регыдджык, да гашкӧ и ӧдйӧджык вермас сюрны вошӧмторйыс. Сідзтӧ объявитны газетын колӧ мынтыны бура уна сьӧм. Ми думайтам, оз на ӧд быдӧнлӧн вичмы сьӧмыд объявленньӧ вылад. Бурджык эськӧ вӧлі, ті кӧ, коми крестьяна, ёнджыка пондінныд судзӧдны ассьыныд газетнытӧ — тайӧ «Коми Сиктсӧ».

Тайӧ юкӧдас «Кодлӧн мый вошӧма да кӧні мый сюрӧма» кутам гижавны юӧръяс воштысьӧмъяс йылысь дзик крестьяналысь толькӧ — мукӧдъяслысь печатайтам дон босьтӧмӧн.

Ӧні колӧ крестьянинлы, мыйкӧ кӧ ыджыдджыктор (овмӧсысь, татчӧ оз пырны удостоверенньӧяс да мукӧд документъяс) вошас, регыдджык ыстыны «Коми Сикт» газет редакцияӧ гижӧд (юӧр). Кодлыкӧ кӧ мыйкӧ сюрас — сідзжӧ колӧ ыстыны гижӧд.

Талун ӧткымынтор лэдзам нин.