ОЗ КОВ ЛЭДЗНЫ ВУНӦДНЫ ЛЫДДЬЫСЬНЫ-ГИЖНЫ!

Гырысьясӧс велӧдан школаясын муртса велалӧны лыддьысьны-гижны. Куим тӧлысьӧн, дерт, ёна он велав. Велӧдчысьыдлӧн школаысь петӧм бӧрын, оз кӧ кут сійӧ шочиника лыддьысьны-гижны, грамотаыд регыд вунӧ, став велӧдчӧм уджыс весьшӧрӧ сылӧн вошӧ, вошӧ деньга сійӧс велӧдӧм вылӧ. Мед сійӧ эз вӧв, колӧ ликпунктын велӧдчӧм бӧрын малограмотнӧйяссӧ чукӧртлывлыны, вӧскресенньӧясӧ лыддьысян керкаясӧ газетъяс да нигаяс лыддьыны.

Быд лыддьысян керкаын колӧ бӧрйыны ӧтик чукӧрӧ гырысь шыпасӧн (букваӧн) печатайтӧм коми нигаяс. Сэтшӧм нигаяссӧ колӧ разӧдны сиктъясӧ, кӧні эмӧсь ликпунктын велӧдчылӧм йӧз.

Колӧ налы бӧрйыны бур гижӧдъяс газетъясысь («Коми Сиктысь», «Югыд Туйысь»). Сэтшӧм гижӧдъяссӧ колӧ пасйыны гӧрд либӧ лӧз карандашӧн, мед омӧлика лыддьысьысь мортыд регыдджык аддзас колан гижӧдсӧ.

«Долой неграмотносьт» обществоӧ пырӧм шленъяслы колӧ нуӧдны тайӧ уджсӧ. Быд грамотнӧй морт мед отсалас велӧдны омӧля грамотнӧйӧс. Лыддьысян керкаын удж нуӧдысьяслы медвойдӧр колӧ чуксавны ликпунктын велӧдчӧм йӧзсӧ пырны быдсяма кружокъясӧ. Колӧ ликпунктын велӧдігӧн на велӧдчысьясӧс тӧдмӧдны нига-газетӧн: куш буквар лыддьӧмсьыд велӧдчысьяс дӧзмасны.

Матыстӧй нига-газет ликпунктысь петысьяслы!

Энӧ сетӧй вунӧдны грамота!

Ж—в.