МЫЙЛА ВОЙДӦР ЭЗ ВЕЛӦДЛЫНЫ

Кор Россияын юралӧны вӧлі сар да озыр йӧз, найӧ эз думыштлыны уджалысь йӧзӧс да крестьянаӧс велӧдӧм йылысь. Найӧ мӧдарӧ ещӧ ёнджыка зілисны пемдӧдны йӧзсӧ, мед пемыд велӧдчытӧм йӧз бурджыка кывзісны налысь, эз паныд налы мунны. Озыръяс вӧлі тӧдӧны: уджалысь йӧз кӧ велӧдчасны, гӧгӧрвоасны налысь пӧрйӧдлӧмсӧ, оз кутны кывзыны, шыбитасны налысь власьтсӧ. Со мый вӧсна вӧлі уна велӧдчытӧм йӧз Россияын. Велӧдчытӧм вӧсна Россия быд ногӧн ёна коли мукӧд государствоясысь.

Ӧні, выль олӧм лӧсьӧдігӧн, миян медыджыд омӧльыс, торканторйыс лои пемыдлун. Сӧвет власьт зільӧ кокньӧдны уджалысь йӧзлысь уджсӧ; сы вӧсна кӧсйӧ медвойдӧр бырӧдны йӧзлысь пемыдлунсӧ. Октябрса революциялы 10 во тыригкежлӧ, Ленин ёрт шуӧм серти, колӧ велӧдны став велӧдчытӧмсӧ грамотаӧ, мед быд морт кутас кужны лыддьысьны-гижны.