ВЕНЗЬӦМ ЛЕВИН ЁРТ ДОКЛАД КУЗЯ

Оз ков вунӧдны Ленинлысь тшӧктӧмъяссӧ: посни нацияяслы кыдз вермӧмысь отсавны

Мӧскуа. Октябр 15 лунӧ Центральнӧй Исполнительнӧй Комитетлӧн 2-ӧд сессия вылын ёна вензисны Левин ёрт доклад кузя. Лютин ёрт (Пензенскӧй губерняысь) индӧ: Финанс Комиссариат пӧ век сёрмӧ лэдзны сьӧм местнӧй бюджетӧ. Корнев ёрт (Сибырысь) шуӧ: бюджет пӧ РСФСР-лӧн зэв ичӧт мукӧд союзнӧй республикаяс серти — 108 миллион чӧлкӧвӧй резервнӧй фондысь РСФСР-лы сетсьӧ сӧмын 8 миллион. Овмӧс он вермы кыпӧдны ичӧт сьӧмӧн, колӧ РСФСР-лысь бюджетсӧ рӧвняйтны мукӧд республикаяс серти. Коломенскӧй заводысь беспартийнӧй рабочӧй Ларкин корӧ лэдзны сьӧм школаяс вылӧ: миян заводын пӧ, — шуӧ Ларкин, — 2000 челядь оз ветлыны школаӧ. Башкыр республикаысь Халеков ёрт корӧ содтыны бюджет автономнӧй республикаяслы. Курскӧй губерняысь крестьянин Гнипов тшӧктӧ лӧсьӧдны крестьяналы кузь строка кредит: миян Курскӧй губерняын пӧ, — висьталӧ Гнипов ёрт, — уналаын мӧсъясӧн гӧрӧны крестьяна; крестьянин оз вермы ньӧбны вӧв, сылӧн сьӧмыс оз тырмы. «Лӧсьӧдӧй кузь срока кредит крестьяналы, сійӧ вермас кӧзяйство лӧсьӧдны». Совнаркомын юралысьлӧн отсасьысь Лежава ёрт шуӧ: «Оз ков вунӧдны Ленинлысь тшӧктӧмъяссӧ: — посни нацияяслы (ас сёрниа войтырлы) колӧ отсавны кыдз верман».