КОЛӦ ВЕЛӦДЧЫНЫ

Роч крестьяналы да рабочӧйяслы удайтчис шыбитны сарскӧй власьт дай нэмӧвӧйся дзескӧдысьяссӧ: помещикъясӧс да капиталистъясӧс.

Миянлы вӧля эськӧ сюри да, сійӧ этша на. Колӧ мунны водзӧ, бурджык олӧм лӧсьӧдны. Сӧмын миянлысь сійӧ уджсӧ торкӧ зэв ыджыд лёк — асланым пемыдлунным, кужтӧмлунным, велӧдчытӧмлунным. 1919 воын сӧвет власьт лэдзис декрет пемыдлун бырӧдӧм йылысь. Сы бӧрын уна йӧзӧс лои велӧдӧма, сӧмын век на жӧ уна и велӧдчытӧмыс эм. Колӧ, медым найӧ кутчысясны велӧдчыны — сійӧ ас саяныс. Пӧра сы вылӧ сюрӧ, сӧмын мед налӧн вӧлі окотаыс велӧдчынысӧ, сӧмын мед эськӧ найӧ гӧгӧрвоисны велӧдчӧмыслысь бурсӧ.

Арсянь удж этшаджык, рытъяс кузьӧсь, найӧс позьӧ колльыны бура, тӧлкӧн. Колӧ велӧдчыны грамотаӧ. Колӧ велӧдчыны лыддьысьны-гижны сідзи, медым эськӧ ставсӧ гӧгӧрвоан, мый лыддян, медым сыысь вӧлі пӧльза. Миян медыджыд велӧдысь В. И. Ленин, коді нэм чӧжыс сулаліс рабочӧй да крестьяна дор, колис миянлы бурсиӧм: «Октябрса Революциялы дас во тыригкежлӧ мед оз ло весиг ӧтик дзик велӧдчытӧм морт».

Миянлы сӧмын колӧ вӧчны Ленин тшӧктӧм серти, мед рабочӧйяслы да крестьяналы овны вӧлі лӧсьыд.

Ж.—В.