ЭТША НИН ПӦРАЫС КОЛИ
Кызь лун мысти став Сӧветса Республикаяс Союзын лоӧ зэв ыджыд праздник — Октябрса Революциялы кӧкъямыс во тыран лун.
Воысь воӧ Сӧветса государстволӧн овмӧсыс кыптӧ. Воысь воӧ рабочӧйяс да крестьяна мунӧны водзӧ, стрӧитӧны аслыныс выль бур олӧм.
Быд воӧ ноябр 7-ӧд лунӧ рабочӧйяс крестьянакӧд лыддьӧны-арталӧны ассьыныс вӧчӧмсӧ, вермӧмсӧ, кыпӧдчӧмсӧ.
Таво кутасны артавны, мый вермисны найӧ вӧчны кӧкъямыс воӧн, кутшӧма вермисны ёнмӧдны ассьыныс сӧвет власьтсӧ, сылысь овмӧссӧ, сылысь оласногсӧ (политикасӧ).
Сэсся тайӧ жӧ лунӧ рабочӧйяс да крестьяна водзвыв видзӧдласны, мый ковмас вӧчны водзӧ кежлӧ, медым паськыдджыка туйыс воссяс сӧвет власьтлы мунныс, стрӧитчыныс.
Миянлы, коми йӧзлы, сідзжӧ колӧ лӧсьӧдчыны тайӧ ыджыд праздник лун кежлас. Пӧраыс эз нин уна коль, колӧ босьтчыны ӧнісянь нин.
Этша пӧра коли октябрса Революциялы 8 во тыран лунӧдз. Этша нин пӧра коли сылы и дас во тыран лунӧдзыс — сӧмын нин кык во. Сэк кежлӧ миянлы колӧ эштӧдны зэв ыджыд удж — колӧ бырӧдны йӧз костысь пемыдлун. Ленин миянлы тшӧктіс, Октябрса Революциялы 10 во тыригкежлӧ мед эз вӧв ӧтик велӧдчытӧм морт. Кӧсъям кӧ ми, коми войтыр, овны бурджыка, регыдджыкӧн мездысьны сьӧкыд олӧмсьыс, кӧсъям кӧ ми кывзыны Ленинлысь шуӧмсӧ — колӧ бырӧдны пемыдлуннымӧс. Коми войтыр пӧвстын вывті на уна велӧдчытӧм йӧзыс, вывті на ёна падмӧдӧ олӧмсьыс миянӧс асланым пемыдлунным.
Ӧні самӧй Коми обласьтын мунӧ сёрни (
