ЖУРНАЛ «ДЕРЕВНЯСА ТЕАТР»

Ӧні пӧшти быд коми сиктын нин эм театр (нардом), быдлаын нин овлӧны спектакльяс, ворсӧмъяс, сьылӧмъяс, висьтавлӧмъяс. Быдлаын нин эмӧсь и драматическӧй кружокъяс.

Сӧмын колӧ шуны: пӧшти некӧн на оз тӧдны, кыдзи колӧ спектакльяссӧ пуктыны, кыдзи ворсны сцена вылын, кыдзи лӧсьӧдны сценасӧ — шуны кӧ, оз кужны, кыдзи колӧ пуктыны деревняса театрсӧ.

Деревняса уджалысьяслы ыджыд отсӧг вермас сетны выль журнал — «Деревняса Театр» («Деревенский Театр»). Тайӧ журналсӧ лэдзӧ «Крестьянскӧй Газет». Журналыс петӧ быд тӧлысьын ӧтчыд, доныс: 1 тӧлысь кежлӧ 20 ур, 3 тӧлысь кежлӧ 60 ур; 6 тӧлысь кежлӧ 1 ш. 10 ур, во кежлӧ 2 ш. 25 ур.

«Деревняса Театр» журналыс тайӧ — зэв бур отсӧг деревняын культурнӧй удж нуӧдӧмлы: велӧдӧ, индалӧ, туйдӧдӧ, кыдзи бурджыка сувтӧдны театрын удж: спектакль, сьылӧм, музыка, гажа висьталӧм, ворсӧм, мукӧдтор.

«Деревняса Театр», индалӧм-туйдӧдӧм статьяяс кындзи, печатайтӧ уна пьесаяс, сьыланкывъяс, частушкаяс, нотаяс, ворсӧмъяс — ставсӧ кокньыдик кывйӧн (позьӧ сы вылысь комиӧн сэсся лӧсьӧдны), медым быдтор вӧлі гӧгӧрвоана деревняын.

«Деревняса Театр» — зэв бур отсӧг (пособие) лыддьысян керкаяслы, драматическӧй кружокъяслы, став культурнӧй удж нуӧдысьяслы.

Ми зэв сьӧлӧмсянь тшӧктам тайӧ журналсӧ судзӧдны быд деревняӧ лыддьысян керкаясӧ.

Адресыс со кыдзи: Москва, Воздвиженка, 9. Редакция журнала «Деревенский Театр».

Нёбдінса Виттор.