ВЫСТАВКА ВЫЛЬГОРТЫН

Октябр 4-ӧд лунӧ Выльгортын (Сыктыв уезд) вӧлі первой на ичӧтик сельскокӧзяйственнӧй выставка. Выставкасӧ лӧсьӧдісны тэрмасигтырйи, водзвыв висьтавлытӧг да, крестьяна этшаӧн тӧдлісны. Сы вӧсна выставка вылын йӧз эз вӧв уна. Волісны унджыкыс олӧма крестьяна. Выставкакӧд ӧтпырйӧ нуӧдісны урожай праздник.

Выставка восьтігӧн висьталісны, кутшӧм бурторъяс вермасны лоны крестьяналы, мыйла лӧсьӧдӧма урожай праздник да кыдзи сійӧс колӧ колльыны.

Участокса агроном Темноев висьтавліс: кыдзи бура колӧ быдтыны няньяс, турунъяс, град выв быдтасъяс; кыдзи бурмӧдны да мыйӧн бурмӧдны муяс, видзьяс; кыдзи уджавны ӧтувйӧнджык, машинаясӧн да уна переменаӧн. Крестьяна зэв сьӧлӧмсянь кывзісны Темноевлысь висьталӧмсӧ. Медсясӧ нин ёна кывзісны нюр косьтӧм йылысь, кодӧс ӧні выльгортса крестьяна косьтӧны. Выставка вылӧ крестьяна ассьыныс нинӧм эз удитлыны вайны.

Выставкаыс да праздникыс эськӧ вӧлі зэв ичӧтик, петкӧдланторйыс этша, сӧмын сійӧ весьшӧрӧ эз ло. Крестьяна водзӧ вылӧ пондасныджык тӧдны сылысь бурторсӧ, пондасны водзӧ кежлӧ паськӧдны найӧс да кыпӧдны ассьыныс кӧзяйствосӧ.

Н. Чеусов.