ВЕЛӦДЧӦЙ ГРАМОТАӦ

Талунсянь миян обласьт пасьта кутас мунны висьтавлӧм (кампания) став велӧдчытӧм йӧзлы, мед найӧ пырасны велӧдчыны школаӧ. Тайӧ висьтавлӧмсӧ колӧ ёнджыка паськӧдны, медым кутісны тӧдны быд пельӧсын велӧдчытӧм крестьянкаяс да крестьяна, кутшӧм ыджыд лёк сылы вайӧ велӧдчытӧм пемыд олӧмыс.

Тайӧ уджсӧ нуӧдны колӧ быд тӧлка велӧдчӧм мортлы. Уездувса да вӧлӧсьтувса нывбаба костын удж нуӧдысьяслы колӧ бура кутчысьны тайӧ удж дінас. Колӧ зільны, медым унджык крестьянкаяс пырасны гырысьясӧс велӧдан школаӧ.

Грамотнӧй делегаткаяслы колӧ висьтавлыны суседкаясыслы, кутшӧм ыджыд бур вермӧ сетны велӧдчӧмыс крестьяна кӧзяйствоын, мукӧд удж вылын. Висьтавлыны — велӧдчӧма кӧ эськӧ крестьянкаыс, сійӧ нигаяс серти вермис лӧсьӧдны ассьыс олӧмсӧ, кокньӧдны сьӧкыд уджсӧ.

Кольӧм тӧв миян гырысьясӧс велӧдан школаын велӧдчисны уна нывбаба нин. Локтан тӧлын колӧ ещӧ унджыкӧс, дай велӧдны сідзи, мед эськӧ петісны школасьыс збыльысь грамотнӧй мортӧн. Некутшӧм бур оз сет крестьянкаыдлы, сійӧ кӧ ачыс оз кут сьӧлӧмсяньыс велӧдчыны, кутас прӧста волывлыны да вугравны школаас.

Кодъяс крестьянкаясыс велӧдчисны кольӧм во, налы оз ков эновтчыны таво, колӧ пырны мӧд группаӧ, кӧні велӧдӧны омӧля велӧдчӧм йӧзӧс. Этша босьтан пӧльза, кужан кӧ сӧмын лыддьысьны складӧн да кырымасьны.

Обласьтувса нывбаба костын удж нуӧдан юкӧд надейтчӧ — уездъясын да вӧлӧсьтъясын нывбаба костын удж нуӧдысьяс, тшӧтш партийнӧй да комсомол ячейкаяс сьӧлӧмсяньыс кутчысясны тайӧ удж дінӧ, кыскасны велӧдчыны пемыд аньясӧс.

Обласьтувса нывбаба костын удж нуӧдан юкӧд.