СЁРМӦДЧЫНЫ ОЗ ПОЗЬ

Босьтам кӧ ми таво тулысса газет номеръяс (май да юнь тӧлысьясысь), пӧшти быд номерысь аддзам: сэні сю ӧзим ставыс тшыкӧма да тулыснас выльысь лои кӧдзны, сэні кӧйдысыс абу и чужлӧма, сідз водзӧ. Ставыс тані мыжа вӧлі бокысь вайӧм кӧйдыс — роч кӧйдыс. Сы вӧсна лои миянлы шуны — бокысь вайӧм кӧйдыс мукӧд воас оз чуж миян муяс вылын. Колӧ эновтчыны сійӧ кӧйдыссьыд. Колӧ корсьны мӧд туй кӧйдыс лӧсьӧдӧм вылӧ. Колӧ миян кӧдзны муяс ас кӧйдысӧн, лӧсьӧдны ас кӧйдыс. Сы вӧсна быд вӧлӧсьтын колӧ лӧсьӧдны ас кӧйдыс запас.

Ми та йылысь вель уна нин газетын гижлім. Эм кӧйдыс запас лӧсьӧдӧм йылысь Обисполкомлӧн постановленньӧ. Сӧмын тай мыйкӧ вӧлӧсьтъясыс — крестьяна ни, волисполкомъяс ни — эз на вӧрзьыны тайӧ уджын. Ми огӧ на тӧдӧй, кӧнкӧ весиг ӧти сиктын кӧть босьтчисны эз на кӧйдыс запас лӧсьӧдан уджӧ.

Тайӧ уджыс эськӧ зэв колантор. Ас кӧйдыс запас лӧсьӧдан удж — ӧнія удж. Сёрмӧдчыны дзик ньӧти оз позь.

Кӧйдыс запас позьӧ лӧсьӧдны кык ногӧн: крестьянаӧн скод вылын шуӧм серти кӧйдыссӧ чукӧртӧмӧн дай нарошнӧ кӧйдыс вылӧ обществоӧн муяс кӧдзӧмӧн (общественные запашки). Дерт, таво сёр нин мутӧ кӧдзны. Та йылысь лоӧ мӧд воын нин мӧвпыштны. Таво колӧ заводитны мыйкӧ мындаӧн крестьяналысь чукӧртны кӧйдыс запассӧ.

Государство крестьянаӧн кӧйдыс запас лӧсьӧдӧмлы ёна отсалӧ. Сійӧ лэдзліс та йылысь декрет 1922 воын нин. Кӧйдыс запас, сійӧ декрет сертиыс, оз позь конфискуйтны, оз позь мукӧдтор вылӧ видзны. Позьӧ сӧмын сійӧс видзны куш муяс кӧдзӧм вылӧ.

Сэсся мӧд во кежлӧ кӧ крестьяна скод выланыс шуасны лӧсьӧдны кӧйдыс запас нарошнӧ та вылӧ муяс кӧдзӧмӧн, государство ещӧ нин ёна отсалӧ.

Крестьяналы дай волисполкомъяслы оз ков вунӧдны — таво миян тӧргӧвӧй организацияяс бокысь кӧйдыс ньӧти оз вайны. Та вылӧ надейтчыны дзик нинӧм. Став надея ас кӧйдыс запас вылӧ. Лӧсьӧдны сійӧс колӧ босьтчыны ӧнісянь жӧ, тайӧ здуксянь жӧ. Тайӧ уджсӧ нуӧдны мог волисполкомъяслы, партийнӧй дай комсомол ячейкаяслы, быд крестьянинлы.