ВОӦ ТӦВ, ВЕЛӦДЧАН КАД

Гожӧмнад видз-му уджалысь йӧзлы оз овлывлы прӧст пӧраыд велӧдчыны-югдӧдчыны. Сэки найӧ уджалӧны лун-лун югыдсянь пемыдӧдз, весиг шойччӧгсӧ аслыныс шоча аддзывлӧны. Велӧдчӧм йылысь некор сэки прамӧя думыштныс.

Ӧні гожся сьӧкыд уджъяс эштісны. Воӧ тӧв. Прӧстджык пӧраыд лоӧ унджык йӧзыдлӧн. Колӧ тайӧ каднас бура пӧльзуйтчыны.

Миян коми деревняясыд ёна на пемыдӧсь. Том йӧз тӧвнад унджыкысь ветлӧны войпуканінъясӧ; прӧста сэні дурӧны нывъяскӧд. Колӧ войпукъяссӧ коллявны выль ногӧн, медым сэні гажӧдчӧмыс муніс бурлань, медым войпукыс пӧри югдӧдчан уджӧ. Миян быд сиктын нин эмӧсь комсомолечьяс. Налы колӧ войпукъяс дырйи зільны деревняса том йӧзсӧ велӧдны. Комсомолечьяслы колӧ босьтчыны нырщикавны сэтшӧминъясас.

Сэсся лыддьысян керкаяс колӧ лӧсьӧдны бура да сэтчӧ кыскыны деревняса йӧзсӧ велӧдчыны. Тӧвнад сэні позьӧ прамӧя велӧдны коми крестьянатӧ выль ногӧн овны да уджавны; ёна найӧ вермасны сэні тӧдмасьны выль законъясӧн, выльногса видз-муӧн вӧдитчан уджӧн, унаторйӧн. Мед уджыс сэні бурджыка муніс, колӧ судзӧдны газетъяс, журналъяс, нигаяс. Зэв эськӧ лӧсьыд вӧлі судзӧдны сэтчӧ «волшебнӧй пӧнар» да лыддигмозыс петкӧдлыны крестьяналы картинаяс — тайӧ зэв буртор, кор лыддьӧны кутшӧмкӧ видз-му кыпӧдан удж йылысь либӧ висьӧмъяс йылысь. Лыддьысян керкаӧ колӧ кыскыны уджавны став деревняса культурнӧй (велӧдчӧм) йӧзӧс — учительясӧс, агрономъясӧс, пельшӧръясӧс, землемеръясӧс, мукӧдӧс. Лыддьысян керкаын жӧ позьӧ бура нуӧдны гырысь йӧз костысь пемыдлун бырӧдан удж. Колӧ сэсся унджыкысь чукӧртлыны сэтчӧ нывбабаясӧс да на костын уджавны: велӧдны, сёрнитны выль олӧм йылысь, лыддявны лекцияяс, вӧчавны докладъяс, сідз водзӧ.

Колӧ тӧв кежлӧ лӧсьӧдны сэсся быд сиктын театр. Сэні уджавны колӧ бара жӧ ӧтвылысь став деревняса культурнӧй йӧзлы. Колӧ эськӧ сідзи театрас уджсӧ нуны, медым быд вежонын вӧлі ӧти спектакль либӧ кутшӧмкӧ «рыт» — сьылӧм, висьтавлӧм. Оз ков некутшӧм ногӧн театрын вӧчны куш йӧктӧм, сыысь этша пӧльзаыс воас. Колӧ ворсны первой кутшӧмкӧ пьеса (медым эськӧ пьесаыс мыйкӧ сетіс жӧ йӧзыслы вежӧрас), либӧ сьывны да висьтавлыны (декламация), сэсся бӧрвылас нин вермас лоны ворсӧмъяс (игры), а йӧктӧм колӧ кольны дзик нин медбӧрӧдзыс. Театртӧ кӧ лӧсьӧдан бура да уджсӧ сэні кутан нуны ёнджыка, сійӧ вермас сетны зэв ыджыд пӧльза йӧзыдлы.

Став тӧвся уджсӧ торйӧн-торйӧн он вермы индыны тані. Уджыд миян Коми обласьтын помтӧм, коми йӧз пиын ковмас ёна на уджавны. Сӧмын уджалӧмсьыс оз ков повны, вочасӧн пыр колӧ нуӧдны кутшӧмкӧ удж.

Дерт, медвойдӧр уджас лоӧ (колӧ) кутчысьны коммунистъяслы, комсомолечьяслы да культурнӧй войтырлы.

Воӧ тӧв, самӧй бур кад деревняын йӧзӧс югдӧдан удж нуӧдны.

Босьтчылӧй сьӧлӧмысь уджавны!