КЫК ДРУГ

(Мойдкыв кодь, эськӧ збыль)

Выльгортын олӧны-вылӧны кык друг — Спира Ӧньӧ да Прокӧ Гриша. Другъясыд зэв быдлаӧ усьласьӧны, корсьӧны кокньыд удж. Кокньыд уджыд эськӧ и сюрліс, босьтлісны карын ыджыд пӧдрад — кирпич вӧчны. Сьӧм лоис уна, быдпӧлӧс сёян-юан уна, уджалысь уна. Удж мӧдӧдчис лӧсьыда: сӧмын шывкъяв да нарадит уджалысьястӧ. Сідзнад найӧ шывкъялісны, шывкъялісны дай юсисны; складас пыр самӧкур юӧны. Юӧмнад тӧлкыд сэсся и вошны пондіс: уджыд омӧля мунӧ, кирпичыд петӧ мисьтӧм, уджалысьясыдлы мынтысьны оз вермыны, складсьыд сёян-юаныд, тшай-сакарыд вошалӧ (вӧлӧм асьныс гусявлӧны мӧда-мӧдыслысь). Сэсся коркӧ-коркӧ кык другыд и банкротитчисны. Тшӧт вӧчигад уна абу судзсьӧмаӧсь, уджалысьясыдлы нинӧмӧн лои мынтысьныд. Мӧдіс суд да рад. Судыс шуис перйыны налысь сё мӧд-коймӧд шайт. Гижалісны эмбурсӧ, скӧтсӧ, турунсӧ налысь; лишнӧйсӧ вузалісны тӧргӧн. Взысканньӧысь уна на эз мын. «Мый жӧ керны?» — шуасьӧны кык другыд: взысканньӧсьыд пӧ ӧд он мын, бара на пӧ ӧд воасны да мыйсюрӧ вузаласны. Коньӧръяс, зэв шогсьӧны, юрнысӧ ӧшӧдӧмаӧсь.

Шуласны: пикӧ воысьяс пӧ зэв кужӧны мӧвпавны, мыйджык колӧ керны. Кык другыд со мый мӧвпалӧмаӧсь: торйӧдчыны бабаяс дінсьыс, семьяяс дінсьыс, да мунны Сибырӧ. Сідзи и вӧчисны: кыкнаныс торйӧдчисны гижсьӧмӧн исполкомын. Суседъясыс пыр кыйӧдчӧны налысь Сибырӧ мунӧмсӧ.

Кольӧ вежон дай, мӧд дай, тӧлысь дай, найӧ пыр на гортынӧсь, олӧны семьяыскӧд ӧтлаын. Сибырӧ мӧдӧдчӧм налӧн оз тыдав. Сэсся суседъясыс юаласны налысь: дыр-ӧ нӧ пӧ онӧ мунӧй Сибырад, паракодъясыд пӧ ӧд сэсся оз пондыны ветлӧдлыны? — Найӧ, висьталӧм пыдди, сӧмын шпыннялӧны.

Вӧлӧмкӧ, кык другыд Сибырад абу и мӧдлӧмаӧсь. Бабаыскӧд да семьяыскӧд юксьӧмаӧсь (торйӧдчӧмаӧсь) дзик сы понда, медым водзӧ вылӧ нинӧм оз сюр вузавны эмбуруловысь взысканньӧсӧ мынтыны. Ӧні сідзи и шуӧны асьныс: миян пӧ немтор абу, ставыс пӧ мый эм — бабалӧн да семьялӧн, налысь пӧ нинӧм вузавны закон оз лэдз.

Со кыдзи кык другыд мудеритӧмаӧсь! Но, ог тӧд, татшӧм мудеритӧмыд кӧ оз курдӧд бӧръяпомнас.

Кирпич.