МУДЕР ПРИКАЗЧИК

Пӧрйӧдлӧ йӧзӧс. — Овмӧдчис йӧз сьӧм вылӧ.

Зеленечын (Сыктыв уездын) кооперативса приказчикыс Камбалов зэв мудера кутіс вузасьны. Кооператив воссьӧм бӧрас первойсӧ зэв бура эськӧ тӧргуйтліс, да ӧні тшыксис — пондіс ньӧбасьысьястӧ бӧбйӧдлыны (ылӧдлыны). Унаысь кывлывлан босьтасьысьяслысь: ёна пӧ пӧрйӧдлӧ весӧн, медся нин ёна ӧнія килограммъяснад да ситечтӧ мерайтігӧн метръяснад. Ёна кывсьӧ — пемыдджык йӧзӧс пӧ сдачаяс сеталігӧн пӧрйӧдлӧ. Сэсся тӧваръяссӧ морт серти сеталӧ, быттьӧ лавкаыс аслас, абу кооперативлӧн.

Видзӧдлан кӧ, олӧмыс сылӧн ёна нин важ серти вежсис. Приказчикас пыртӧдз олӧ вӧлі батьыс ордын патераын. Семьяыс овліс — няньыс вӧвлі муртса пудйысь пунтӧ. Керка лэптӧ да, вӧлі куш срубйыс, дай сійӧ на вӧлі уджйӧза.

Ӧні, колян восянь, керкасӧ лэптіс ёсь юръясӧн, юр вылас на юр лэптіс (чардак), гӧгӧр, кӧні олӧ, джоджъяссӧ краситалӧма. Сы кодя ӧні Зеленечын олысьыс абу: яй да чери оз быравлы. Бабаыс шоч лунсӧ лавкасьыс сёянсӧ оз катлы. Ставныс пырисны ной пиӧ. Служитӧмсьыс сьӧмсӧ босьтӧ сӧмын 25 шайт. Сы вылӧ ӧд нёль морта семьянад он на зэв паськӧдчы! Гӧль йӧзӧс пӧрйӧдлӧмӧн татшӧмасӧ овмӧдчис Камбаловыд.

Ревизионнӧй комиссия, мый нӧ узян? Садьмыны кад. Прокурор, садьмӧд регыдджык Зеленечса кооператив правленньӧӧс да ревизионнӧй комиссияӧс.

Сиктса.