ВӦЛІ РЕВИЗИЯ — ДА ЫЛӦДЧӦМ ЛОИ

Барышыс, 986 шайт пыдди, 200 шайт кындзи абу. — Инструктор Рожицын пӧнӧма.

Айкатыласа (Емдін уездувса) инвалиднӧй кооперативын вӧлі вогӧгӧрся учёт. Учёт вылас тӧдмалісны инвалид лавкаса шленъясӧс, кутшӧма кооперативыс вузасис да мый бурсӧ сійӧ сетіс инвалидъяслы. Тайӧ учёт кежлас воліс тшӧтш обикоысь (обласьтувса инвалид кооперацияяс ӧтувтчӧмысь) инструктор Рожицын. Ревизияыс муніс лун куим.

Ревизия бӧрас чукӧртісны собранньӧ. Вӧчисны доклад. Висьталӧны: март тӧлыссянь пӧ воӧма куш барышыс 986 шайт. Шленъяс нимкодясьӧны: аттӧ пӧ, кутшӧм бура уджалӧма правленньӧыд. Шуисны юклыны барышсӧ инвалидъяслы да гӧль дӧваяслы, кодъяс шленынӧсь, отсӧг вылӧ 232 шайт.

Неважӧн казялісны — вӧлӧмкӧ чистӧй барышыд абу на 986 шайт. Медым сымда барышсӧ босьтны, колӧ вӧлӧмкӧ вузавны на тӧвартӧ 4.200 шайт дон. Сійӧ вузалігад ӧд лоӧны на и рӧскодъяс. Обикосьыд «бур» инструкторыд баланссӧ абу и гӧгӧрволӧма. Активас кольӧм тӧварсӧ (4.200 шайт донсӧ) гижӧма вузалан доннас, пассивас абу гижӧма, кутшӧм доныс тӧварыслӧн (кутшӧм наценкаыс). Ещӧ ӧд кор на вузалан сійӧ тӧвартӧ, дай вермас на лоны убытка!

Став барышыс вӧлӧмкӧ збыльысьсӧ воӧма сӧмын 200 шайт гӧгӧр. Дай вӧлӧмкӧ сійӧ 200 шайт барышыс воӧма абу март тӧлыссянь, а вогӧгӧрся тӧргуйтӧмысь.

Со кутшӧма ревизиятӧ вӧчӧма инструктор Рожицыныд. Ещӧ ӧд обласьтсянь, тӧлка морт пыдди ыстӧмаӧсь! Со кыдзи ылӧдісны кооперативса шленъястӧ! Тшӧт нуӧдысьыс сэтшӧм жӧ вӧлӧма.

Колӧ пырысьтӧм-пыр выль пӧв ревизия вӧчны. 232 шайт шленъяс шуӧм серти юклісны нин дай ещӧ на барыш кооперативысь надейтчӧны.

Ном.