ОШЪЯС СИКТЫН ВЕТЛӦДЛӦНЫ

Читаёвын (Сыктыв у.) крестьяна матӧ воӧмаӧсь ошъясӧн. Быд вой ошъяс ветлӧдлӧны сиктъясын, куталӧны ыжъясӧс да мукӧд скӧтӧс. Сёйисны нин вит гырысь мӧскӧс дай чаньӧс. Крестьяна некыдзи оз вермыны водзсасьны ошъяскӧд.

Ошъяс уна нин вӧчисны убытка крестьяналы: ӧти-кӧ, сёйисны скӧт; мӧд-кӧ, скӧтӧс лои картаӧ йӧртны водз да лишнӧй турун вердны. Эм эськӧ вӧралысьяслӧн союз (союз охотников), да налӧн сӧмын ӧти жугалӧм пищаль. Крестьяна вӧлі шуасьӧны ӧтвылысь кыдзкӧ кыйны, да паныдсӧ налы некод эз мун. Ӧнӧдз виисны сӧмын кык ошкӧс на.

Цырош.