ПЕЗМӦГСА СӦВЕТ БӦРЙИСНЫ

Пезмӧг вӧлӧсьтын (Кулӧмдін уезд) сӧветӧ бӧрйысьӧм помасис сентябр 29-ӧд лунын. Сӧветас бӧрйысьӧм уджсӧ нуӧдны воліс обласьтувса карысь Забоев ёрт. Бӧрйысьӧмыс муніс куим сиктын. Бӧрйысян собранньӧ вылас волісны 22% (сё морт пытшкысь 22 морт). Вӧлӧсьтувса сӧветӧ бӧрйисны дас квайт мортӧс, на пиысь нёльӧд юкӧныс коммунист партияысь кандидатъяс да комсомолечьяс. Бӧрйысигӧн комсомол ячейка некутшӧм список бӧрйыны эз мыччыв, бӧрйисны сідзи, списоктӧг. Сӧветӧ сюри куим нывбаба (колян во ньӧтик эз вӧв). Вӧлӧсьтувса съезд муніс кык лун чӧж, 10 час асывсянь да 11 час рытӧдз (колян во бӧрйисны сӧмын ӧтик рыт).

Съезд вылын ёна сёрнитісны кӧйдыс фонд лӧсьӧдӧм йылысь, пельшӧрскӧй пункт лӧсьӧдӧм йылысь да выль школа эштӧдӧм йылысь (вӧчныс заводитісны таво гожӧм). Вӧлӧсьтувса исполком доклад кузя съездыс шуис: уджсӧ пӧ нуӧдӧма шӧркоддьӧма, сӧмын пӧ абу ён вӧлӧма кутӧдыс (связь) лыддьысян керкакӧд, кооперативкӧд да школаяскӧд. Выль бӧрйӧм йӧзлы тшӧктісны лӧсьӧдны ёнджык кутӧд накӧд да уджсӧ на пытшкын пуктыны бура.

Вӧлӧсьтувса исполкомӧ веськаліны кык беспартийнӧй да ӧтик кандидат РКП (б). Юралысяс лои Гӧрд армияысь выль воӧм морт.

Надейтчам — выль бӧрйӧм йӧз кутасны уджавны бура.

Ёрт.