ПАНЫД ЭН СУВТ!

«Чуклӧмса волисполкомын (Сыктыв у.) юралысь Лапшин „звиженньӧ“ праздник лунӧ кучкис ӧтик Межадорсалы да сійӧс сэсся нӧйтісны став крестьянаыс».

(Газетӧ гижысь).

Исполкомын юралысь талун гажа, вывті гажа. Абу и дивӧ: талун ӧд «звиженньӧ» — храм праздник, ӧтчыд во гӧгӧрнас овлӧ. Сё майбыр, ерӧмакань-кукань!..

Тӧрытсянь нин юралысь лӧсьӧдчис праздничайтны. Юыштіс самӧкур, горзыштіс гортас, швачкис сэсся пызанас кулакнас.

— Мый нӧ тэ керсян? — чуймис гӧтырыс.

— Эн торк тэ меным! Ме — юралысь, пред-се-да-тель! Кылан? Став вӧлӧсьтыс менам кипод улын! У-км!.. Окотита кӧ, ставсӧ пасьварта! Со ме мыйта сила имеита, ерӧмакань!..

— Пызаныс ӧд абу мыжа сыысь, — бара шуас гӧтырыс.

— Ланьт тэ, трасича! Пызан кӧть лабич — ӧткодь меным! Окотита кӧ — стенӧ юрӧс жугӧда, некод оз вермы кутны! Сы вылӧ и ме!..

— Дзикӧдз нин тайӧ службанад тэ матайтчӧмыд буракӧ да, он тӧд мый и вӧчан.

— Шӧть... Тэ тӧдан: аски — звиженньӧ, гашкӧ ковмас на и распӧражайтчыны мыйсюрӧ вылын... Ме ӧд — председатель...

Воис звиженньӧ. Юралысь асывсяньыс гажа, вывті гажа. Сьывсьӧм бӧрын йӧз петісны ывлаӧ довъявны — «гуляйтны»: нывъяс, зонъяс, челядь, олӧма йӧз — мужикъяс, бабаяс. Сьылӧны, гудӧкӧн ворсӧны, унаӧн лявзӧны, прӧста горзӧны, матькӧны — дзик «праздник» и эм!

Юралысь тшӧтш ветлӧ-гуляйтӧ:

— Пӧрадок мед эз торксьы! Гуляйтны позьӧ, ме ачым со гуляйта, ме эськӧ председатель да, гуляйта; лёкыс сэн абу... Эй, да о-о! У-ук!.. Гажӧдчӧй, бур йӧз! Мед косьяс толькӧ эз вӧвны, ог жалуйт ме косьтӧ! — Дзик пыр кута! Ак, ерӧмакань-кукань! Гажа жӧ нин!.. Ок, дай «по улице камаринскӧй мужик!» — сьывны горӧдіс.

Юралысь дінӧ чукӧртчисны бура унаӧн, тшӧтш отсалӧны сьывны. Мунӧны туй кузя, шатлалӧны, лявзӧны мыйсюрӧ.

— Ок, ерӧмакань!.. А бур ӧд ме председательыд, а?

— Бур, бур!.. Короший роботник!.. По краним мерӧ — да!..

— Ме став вынӧс тіян вӧсна пукта!.. Ме — тіян юрныд и сьӧлӧмныд, сідз абу, а?

— Сідз! Десьтвительнӧ!..

Паныдасисны налы куимӧн, мукӧд гуляйтысьяс, сьылӧны-мунӧны туй кузя.

— Стой! — горӧдіс юралысь: — Ті кутшӧм йӧз? Какой право имеитанныд пӧрадок нарушайтны?

— Ми — Кӧча сиктса, а тайӧ мортыс — Лазъяысь, Семӧӧн шуӧны...

— А-а, Семӧӧн, абу татчӧс? Мыйла локтін?

— Празднуйтны, гӧститны, — шуӧ Семӧ.

— Празднуйтны кӧ нӧ локтін, мыйла горзан, дай код, ерӧмакань!.. Ме — председатель тані, тэ вылӧ сейчас акт составита...

— Ме ог горзы да, лючки тай со муна ёртъяскӧд туй кузя...

— Тэ код, мися, тыдалӧ ӧд! Кок йылад ӧдва ӧшъян, ерӧмакань-кукань! Ещӧ и пӧръявны кӧсъян пред-се-да-тель-ӧс?!..

— Ачыд тэ, председатель ёрт, вот и код нин...

— Ме, ме код?!.. Трасича!.. Власьтӧс тэ лысьтан оскорбляйтны?.. А?! На тэныд! —

Косьыштіс сэн юралысь веськыд кинас Семӧӧс пель дінас, шуйганас тільскӧбтіс ныр-вомас. Семӧ тювгысис туй вылӧ, вир чепӧсйис нырсьыс. Сылӧн ёртъясыс ӧдйӧджык весасисны сэтысь.

Семӧ кӧсйис чеччыны. Юралысь уськӧдчис, вожасис Семӧ вылӧ, горӧдіс:

— Граждана! Дорйӧй менӧ!.. Тайӧ — бандит, менӧ вины вермас!.. Ка-ра-у-ул!.. Дорйӧй мися, отсалӧй!..

Код йӧз чукӧрлы эз ковмы ещӧ ӧтчыд шуӧм. Ставныс ӧтвылысь уськӧдчисны Семӧ вылӧ. Швачкӧны, гымгӧны, тільскӧны, сизьдӧны, гыпкӧны, жбоньгӧны. Семӧ ымзӧ, ойгӧ толькӧ, чеччыны оз вермы, оз лэдзны.

— Часлы, Опонь, ме лӧсышта балябӧжас!

— Вайлы меным кырссьыштны сӧтанаӧс!

— Председатель ёрт, лэдзлы менӧ! Ме бара лешакӧс дӧлӧда!

— Ми, председатель ёрт, ставным тэ дор сулалам!.. Ми ставным тэнад индӧмӧд мунам!..

— Дерт жӧ, сват! Ачыс кӧ председательыд первой кучкис, быдӧнлы колӧ сы туйӧд мунны! Сійӧ ӧд — власьт миян, начальство...

Тадзи кодя Чуклӧмса волисполкомын юралысь праздничайтӧма звиженньӧ лун, «звиздитӧма» Межадорсалы. Ок, эськӧ асьсӧ колӧ кыдзкӧ «звиздитны» тайӧ уджсьыс!..

Ӧльӧв.