НАЛОГ МЫНТЫНЫ ЛӦСЬЫДДЖЫК СЬӦМ ЧӦЖАН КАССАЯС ПЫР

Таво крестьяналы зэв лӧсьыд мынтыны сельхозналогтӧ. Оз ков ветлыны ылӧ, сӧмын волыны аслад волисполкомӧдз. Позьӧ налогтӧ мынтыны быд прихода-рӧскода кассаӧ, позьӧ налог мынтӧм вылӧ сьӧм ыстыны поштаӧн.

Медым ещӧ нин кокньӧдны крестьянаӧс налог мынтӧмнас, Финанс Народнӧй Комиссариат тшӧктіс быд сьӧм чӧжан кассалы мынтавны сельхозналогсӧ крестьянинлысь, пуктӧма кӧ крестьяниныслӧн сьӧмсӧ кассаас.

Крестьяниныд ӧд налог мынтӧм вылас сьӧмсӧ чукӧртны ӧтпырйӧсӧ оз вермы. Сылы лоӧ тыртысьны вочасӧн. Вочасӧн да ичӧтикаӧн сьӧмтӧ чӧжан кассаӧ дай сэсся тшӧктан кассаыслы мынтыны налогтӧ.

Гортын дорысь кассаын сьӧмтӧ налог вылӧ чӧжны, дерт, бурджык. Кассаад он нин пов вошӧмысь. Сэсся касса ас ордас сьӧм видзӧмысь сетӧ прӧчентъяс дай сетӧ вель ыджыдӧс. Сійӧ прӧчентъяссӧ бара жӧ позьӧ сетны налог вылӧ. Сідзкӧ сьӧм чӧжан кассаӧ оз ков чукӧртны сьӧмтӧ дзик налог тырыд, неуна этшаджык.

Сьӧм чӧжан кассаяс ӧні восьталӧма быд поштӧвӧй отделенньӧ бердӧ. Кор воас налог мынтан срокыд, колӧ сӧмын юӧртны сьӧм чӧжан кассатӧ, медым сійӧ налогсӧ мынтас, сетны сэтчӧ окладнӧй листтӧ, тшӧтш кассасянь сетӧм книжкатӧ дай ставыс.

Юӧр воӧм мысти сьӧм чӧжан касса пасъяс ыстӧм книжкаӧ крестьянинлы сьӧм сетӧм йылысь, гижас окладнӧй листӧ налог мынтӧм йылысь дай сэтчӧ пуктасны печат да кырымасясны.

Сэсся сьӧм чӧжан касса сетас нарошнӧ лӧсьӧдӧм квитанция налог мынтӧм йылысь. Сійӧ квитанцияыс пыдди пуктыссьӧ волисполкомъясӧн сетӧм квитанцияяс моз жӧ. Квитанциякӧд ӧтлаын крестьянинлы ыстыссьӧ бӧр сылӧн окладнӧй листыс.

Тадзиӧн сьӧм чӧжан касса пыр крестьяналы торъя дӧжнасьтӧг (тӧждысьтӧг) позьӧ мынтыны ассьыныс налогнысӧ.

Александров.