ЗӦВСЬӦРТСА ВИДЗ-МУ УДЖАЛАН ТӦВАРИЩЕСТВОЛӦН УДЖЫС

Зӧвсьӧртын (Емдін уездын) видз-му уджалан тӧвариществоса шленъяс таво видлӧг вылӧ кӧдзавлісны мӧс сёркни (турнепс) да вика. Урожайыс кыкнаныслӧн воис шӧркоддьӧма. Викасӧ ытшкисны дзордзалігас веж кӧрым вылӧ. Ме чайта, татшӧм кӧрымъяссӧ тӧвариществоса шленъяс кутасны кӧдзны водзӧ кежлӧ.

Эм сэсся тӧвариществолӧн ай порсь йоркширскӧй породаысь. Пӧшти быд тӧвариществоса шленлӧн эм татшӧм порода порсьыс. Восьтӧны вӧвъяслы случнӧй пункт. Лоӧ сэні племеннӧй уж.

Тӧвариществоыслӧн эм сир да скипидар вӧчан завод. Сӧмын тай скипидарсӧ лоӧ нуны Северо-Двинскӧй губерняӧ; миян обласьтӧ эськӧ сэтысь вайӧны да.

Ӧні вӧчисны гырнич вӧчан завод. Лӧсьӧдӧны стрӧитны дьӧгӧдь завод.

Тӧвариществоса шленъяс зэв ӧтвылысь уджалӧны: быд удж вӧчӧны субӧтникъясӧн.

Ип.