БАРА КУТІС КУСНЫ

Ми некор огӧ вермӧ ӧтпырйӧ помавны кутшӧмкӧ ыджыдджык удж. Торъя нин дыр кутіс нюжавны сьӧм чукӧртӧм «Коми морт» нима лэбалан машина вылӧ. Во кык кымын, буракӧ, кыссьӧ нин тайӧ уджыс-а, зэв на этша чукӧрмис. Тӧлысьӧн-джынйӧн сайын таво лэбалан машинаыс воліс Коми муӧ, унаӧн аддзылісны, унаӧн лэбалісны — быдӧн нин тӧдӧны сылысь коланлунсӧ.

Сы бӧрын чорыда босьтчылісны отсавны сьӧмӧн лэбалан машина вылӧ, унаӧн сетісны мый вермисны «Коми Морт» вылӧ, унаӧс вӧлі чуксалӧма тшӧтш сетыштны сы вылӧ — миян газетын местаыс вӧлі оз тырмы став «вызовъяссӧ» ӧтпырйӧ лэдзны. Ми чайтлім, мися, тадзи кӧ водзӧ кутас мунны, «Коми Морт» нима лэбалан машинаыд миян регыдӧн и лоас. Нимкодь быдӧн вӧлі.

Коли тӧлысьӧн-джынйӧн. Сьӧм сеталӧм лэбалан машина вылӧ пыр кутіс вочасӧн чинны. Бӧръявылыс и дзикӧдз кусі. Бара воим важ выйӧ...

Чукӧрмис тӧлысьӧн-джынйӧн сьӧм 836 ш. 11 ур толькӧ (эгӧ вермӧ воны весиг сюрс шайтӧдз). Ставныс кӧ эськӧ сетісны, кодӧс вызовитӧма газетын, вӧлі нин сюрс вит саяс.

Дерт, вежӧра гӧгӧрвоана йӧзлы оз ков некутшӧм «вызов», налы аслыныс колӧ тӧдны аэропланыдлысь миянлы коланлунсӧ (пӧльзасӧ) да кортӧг колӧ отсыштны мый вермӧны.

Сідзи унаӧн и вӧчисны. Жертвуйтісны «Коми Морт» вылӧ мыйта вермисны ас вӧляысь, некодсянь «вызов» эз виччысьны. Сэтшӧмъясыд, тыдалӧ, тӧждысьӧны бурджык овмӧс лӧсьӧдӧм вӧсна.

Коді оз кӧсйы отсавны, сійӧс кӧть дасысь вызовит — пӧльзаыд этша лоас. Кодсюрӧӧс кӧ вӧлі чуйдӧдан «вызов» серти сьӧм сетӧм йылысь, вӧлі воча кыв видзасны: ме пӧ сідз нин ачым «Авиахим» обществоын шленын, взносъяс пӧ мынта нин. Дерт, бур делӧ сійӧ — «Авиахимӧ» пырӧмыд. Сӧмын ӧд миян зэв на этша сэтчӧ пырӧм йӧзыс — 2000 морт гӧгӧр. Артыштам, уна-ӧ вермас чукӧрмыны сьӧм: шленскӧй взнос 60 ур быд шленысь вонас, 2000 шленсянь вонас чукӧрмас 1200 шайт; тадзинад ковмас чукӧртны миянлы «Коми Морт» вылад... комын во... Миян ловъя дырйи огӧ нин вермылӧй судзӧдныд аэроплантӧ...

Сэсся мукӧдыслы вӧлі шуам, мися, лоӧ газетӧ пасйыштны кодъясӧс вызовитлісны да эз на сетны сьӧмсӧ, да сы вылӧ вӧлі шуасны: оз пӧ позь, сійӧ пӧ лоӧ мырдӧналӧм. Миян ногӧн, сійӧ оз ло дзик мырдӧналӧм, сійӧ лоӧ толькӧ казьтылӧмӧн (напоминание), медым эськӧ эз вунӧдны, либӧ гашкӧ мукӧдыс эз тӧдлыны вызовъяссӧ ас йывсьыныс. Оз ӧд газет вызывайт, вызывайтӧны торъя йӧз.

Но ладнӧ, ми огӧ кутӧй «мырдӧнавны» газетӧн. Сӧмын колӧ кыдзкӧ-мыйкӧ регыдджык чукӧртны сьӧмсӧ аэроплан вылас. Колӧ кооперативъяслы босьтчывны тайӧ удж бердас ли мый ли, колӧ крестьянаӧс чуйдӧдны татчӧ ёнджыка (мед эськӧ тайӧ гижӧдыс бара эз ло мырдӧналӧм). Оз ков кусӧдны дзикӧдз тайӧ уджсӧ, колӧ ёнджыка паськӧдны.

Коми войтыр, отсалӧй лӧсьӧдны «Коми Морт» нима лэбалан машина!