ГУМАНИТАРНӦЙ КЛАСС

Ворсысьяс:

Кирилл

Ира

Колька

Катя

Действиеыс мунӧ карса патераын. Бать-мам чукӧртчӧны туйӧ. Кирилл куйлӧ диван вылын, лыддьысьӧ.

Первой юкӧн

…Найӧ видзӧдісны миян вылӧ ичӧт челядь моз. Ми кылім асьнымӧс Гулливеръясӧн лилипутъяс костын. Но вӧлі наын мыйкӧ, мый тшӧктіс пыдди пуктыны налысь оружиесӧ. Паськыд синъясӧн, но эз скӧра найӧ видзӧдісны Джим вылӧ. Ме вылӧ видзӧдісны кӧдзыда да ярскӧба. Сӧмын кор налӧн видзӧдласыс усьліс менам веж юрси вылӧ, ме казявлі, мый налӧн видзӧдласыс вежсьӧ, но ме вылӧ веськӧдӧм шыяссӧ найӧ эз лэдзлыны.

БАТЬ. Пыр куйлыштам да лыддьысьыштам… Чеччы да мамыдлы кӧть «аддзысьлытӧдз» шу.

КИРИЛЛ (горзӧ). Мам, пока!

МАМ. Пока, пока, дыш пӧжысь.

БАТЬ. Но?! Чеччы, чеччы, мися. Котӧрӧн пыранінӧ.

КИРИЛЛ. Да чечча, чечча. Сэтшӧма кӧ тэныд колӧ.

БАТЬ. Лида, мыйла тэ сійӧс чеччӧдін? Кокыс кӧмтӧм, висьмас на дай.

КИРИЛЛ. Вермас лоны. Организмӧй экзаменъясысь слабмис. Колӧ шойччыны. Заслужиті. Сідз кӧ нин шуны.

МАМ. Заслужитін, дерт. Ирочка йылысь сӧмын эн вунӧд. Талун площадкаыс пӧдласьӧ водзджык. Водзджык босьт чойтӧ. Но? Сёяныс…

КИРИЛЛ. Шыдыс пӧртйын, няньыс пызан вылын, ваыс юкмӧсын. А юрӧй… норм.

БАТЬ. Ирукӧс ӧбидитан кӧ, оз ло норм. Гӧгӧрво?

МАМ. Туйсӧ вуджигӧн крепыда киӧдыс кут. Не дай Бог…

КИРИЛЛ. Ещӧ мый! Абу кага!.. Ме садикын ачымӧс кык туй вомӧн нин вуджӧдлі.

МАМ. Тэнад быдмигӧн ми асьным эг на верстьӧ вӧлӧй. Юрным куш вӧлі.

БАТЬ. Тэ, старик, татшӧма эн понтуйтчы. Ӧтчыд нэмӧн тэнӧ кагакӧд колям. Сӧвесьтыд мед садьмас!

КИРИЛЛ. Кык лун кежлӧ мунӧны, а быттьӧ мый и лоӧма. Мунӧй нин. Грездлы чолӧм!

МАМ. Сямаӧн ло.

БАТЬ. Ло сямаӧн. Аски рытӧдз кӧть нин.

КИРИЛЛ. Да лоа, лоа.

Бать да мам петӧны. Кирилл бӧр водӧ диван вылӧ, восьтӧ книга.

… Сы вылӧ видзӧдігас лолыд тасасьлӧ кытчӧкӧ. Сійӧ ставнас коксяньыс да пельпомӧдзыс кузь да нюдз визь кодь, ваувса из кытшовтысь визув ва кодь. Сы пытшкын ӧзйис олӧм, кутшӧм овлӧ мортӧн волытӧм вӧрын, кор тувсов шоныдыс вежсьӧ гожӧмлӧн жар окасьӧмӧн. Ӧні ме гӧгӧрвои, мыйла важ грекъяс эскисны дриадаясӧ, наядаясӧ, нереидаясӧ — пуяслӧн, ёльяслӧн, гыяслӧн лолӧ.

Ӧдзӧсас звӧнитӧны.

КИРИЛЛ. О Боже! Тайӧяс коркӧ мунласны оз?!!! (Восьтӧ ӧдзӧссӧ.)

Пырӧ Колька.

КОЛЬКА. Но, сдайтін?

КИРИЛЛ. Но, сдайті.

КОЛЬКА. А сэсся?

КИРИЛЛ. Дасӧд класс, мый сэсся.

КОЛЬКА. Батьясыд кытчӧ мунісны?

КИРИЛЛ. Трӧича аски. Баблысь гусӧ колӧ пӧ лӧсьӧдны.

КОЛЬКА. А тэ?

КИРИЛЛ. Эг тӧр машинаас… Кодкӧ рӧдняысь вӧзйысьӧма. Тэныд мый колӧ?

КОЛЬКА. Ааа… ворсыштны комп вылад.

КИРИЛЛ. Ворс.

КОЛЬКА. Вай мекӧд.

КИРИЛЛ. Дыш. Ачыд ворс. Ме в койку.

КОЛЬКА. Лыддьысьны? «Война и мир» йылысь?

КИРИЛЛ. Незнайка в Солнечном городе йылысь. Ме тэныд ог сорась. А тэ кутан кӧ коркӧя моз равзыны, верман вперед! Гортад…

КОЛЬКА. Мый ме сэтысь эг аддзыв. Асывсяньыс нин лазъя синмаӧсь…

КИРИЛЛ. Асывсяньыс, рытсяньыс… Веськодь. Мед эз суитчыны сӧмын.

…Сёрнитан ӧд да сьылана шыяс вӧсна стӧча гӧгӧрвоны вӧлі сьӧкыд, но ме кылі тӧдсакодь кыв. Монгол кыв кодь. Кыйсӧ сійӧ шуис «аханадаӧн», а чероки вылын сійӧ вӧлі «инаду». Но тайӧ индейскӧй, абу монгол кыв. Индейскӧй диалектъяс пырӧны монгол кыв котырӧ. Тыдалӧ, налӧн ӧти важкыв.

Колька пуксьӧ комп сайӧ, Кирилл водзӧ лыддьысьӧ.

Триньгӧ телепон.

КОЛЬКА. Кирилл, телепоныд. Он кыв? Звӧнитӧны, мися.

КИРИЛЛ. Висьтав, мый некод абу.

КОЛЬКА (босьтӧ трубкасӧ). Алё. Найӧ мунісны… Сиктӧ… Бур. Локта. А кытчӧ? Бур. (Кириллы). Кир, чойыд тэнад… Юрыс пӧ тай висьӧ. Босьтны тшӧктісны площадкасьыс. Кӧсъян ме ветла, тэныд кӧ дыш.

КИРИЛЛ. Дыш-не-дыш… Быть. Чужтісны тай… Тэныд лӧсьыд… Ачыд аслыд господин. Всё. Давай вош. Бӧрнас волы. Ме ог дыр.

КОЛЬКА. Ме тэкӧд…

КИРИЛЛ. Счас!

КОЛЬКА. Прикид не тот?

КИРИЛЛ. Ме вӧсна кӧть пасьтӧгыд ветлы. Всё! Вперёд!

Колька петӧ.

КИРИЛЛ. Кӧвъясис…

Мӧд юкӧн.

Школа дор. Кагульнича да Ира. Локтӧ Кирилл.

КИРИЛЛ. Мый лои?

КАГУЛЬНИЧА. Чолӧм, Кирилл.

КИРИЛЛ. Ирка, мый клюпкан?

КАГУЛЬНИЧА. Бӧрдӧ и бӧрдӧ… Ме юася, мый бӧрдан. Аддза ӧд, доймӧ мыйкӧ. Оз висьтав. Ира, мый лои?

ИРА. Нинӧм.

КИРИЛЛ. Ирка, кодкӧ вачкис тэныд? Ме сылы петкӧдла…

ИРА. Эз.

КАГУЛЬНИЧА. Тэ гортад кӧсъян, да?

ИРА. Да.

КАГУЛЬНИЧА. Пажнайтіс бура, узьыштіс, а сэсся пессьыны кутіс, садьмис да бӧрддзис… Да ӧд, Ирочка? Температура абу, ме мерайті. Но, чайта, век жӧ бурджык сылы мунны гортас.

КИРИЛЛ. Гӧгӧрвоана. Пекнича рыт. Ставлӧн тырыс план. Челядь тайӧ планъясас оз пырны.

КАГУЛЬНИЧА. Кутшӧм тэ сюсь! Ирук, тэ ставсӧ босьтін? Выльлунӧ ӧкмыс час кежлӧ. И эн вунӧд корны бать-мамыдлысь мороженӧй да кино вылӧ сьӧм.

ИРА. Аддзысьлытӧдз, Галина Петровна.

Кирилл да Ира мунӧны карса уличаті.

КИРИЛЛ. Тэ висьталан меным, мый лоис? Менам юр выв тыр удж, а ме тӧвзя тэнад школаӧ кар мӧдарсяньыс… Абу яндзим? Абу? Мый тэ бӧрдан?

ИРА. Менам пиньӧй висьӧ. Сӧмын тэ некодлы эн висьтав.

КИРИЛЛ. Кыдзи ог висьтав? Пинь висьӧмыд тӧдан кутшӧм сьӧкыд висьӧм?

ИРА. Кутшӧм?

КИРИЛЛ. Ноко видзӧдлы ме вылӧ. Ага! Ӧти банбокыд ыджыдджык. Час джын мысти мӧдыс пыктас, и тэ он вермы пӧрччыны платтьӧтӧ. А сэсся… а сэсся юрыд тэнад потас сё торпыриг вылӧ. А мый тэ чайтан? То татшӧм торпыригъяс вылӧ! Менам ёртлӧн дзик тадзи вӧлі, кор сійӧ мӧдӧд классын велӧдчис.

ИРА. А ме первойын на.

КИРИЛЛ. Тэ мӧдӧд классӧ нин вуджин.

ИРА. Ме гортӧ кӧсъя.

КИРИЛЛ. Кутшӧм гортӧ?! Час пуксям автобусӧ и мунам бурдӧдны пинь. Кутан ещӧ гортын лявзыны-бӧрдны! (Ира кӧсйӧ пышйыны.) Ирина! Ирина! Ме тэ бӧрся кар пасьтала котравны ог кут. Ме висьталі, кутшӧм лоас тэнад юрыд. Думышт, коді кутас чукӧртны юр торпыригъястӧ?

ИРА. Тэ пӧръясян, повзьӧдлан менӧ! А ме зубилкаас ещӧ на ёнджык пола мунны!

КИРИЛЛ. Господьӧ-Енмӧ! Да тэ сӧмын думышт, мый кымынкӧ здук! Здук! И оз ло ни дой, ни полӧм! И тэ петан вӧлӧсьтӧ!!! Так. Весиг эн думышт пышйыны. Менам киӧй вынаджык!

ИРА. Вына, да? Вына?

КИРИЛЛ. Да эн горзы! Йӧзыс мый думыштасны?

ИРА. Доймӧ, доймӧ!

МУЖИЧӦЙ. Нывка, кӧн тэнад бать-мамыд? Коді тайӧ зонмыс? Тэ ылалін? Том морт, ме час полиция кора.

КИРИЛЛ. Ира, ноко ӧні жӧ висьтав, мый ме тэнад вок. А то менӧ пуксьӧдасны тюрмаӧ. И тэ колян ӧтнад аслад пыктӧм юрнад. Тор-пы-ригъ-яс, Ира!

ИРА. Ог кӧсйы тюрмаӧ, ог кӧсйы ӧтнам! Гортӧ кӧсъя! Менам пиньӧй висьӧ!

МУЖИЧӦЙ. Мый либӧ тэ горзан? А тіянлы, том морт, ме вӧзъя корны такси да ӧні жӧ мунны больничаӧ.

КИРИЛЛ. Зэв ыджыд аттьӧ! Ачым ме, дерт, эг гӧгӧрво тадзи вӧчны.

МУЖИЧӦЙ. А вот зыксьыны мекӧд оз ков! Зыксьыны оз ков весиг ӧні!

КИРИЛЛ. Аддзан, мый артмис! Аддзан?! Автобус! Котӧрӧн, котӧрӧн… он кӧ, тэ меным абу чой! И мед менӧ босьтасны тюрмаӧ!

Пинь бурдӧдан поликлиника. Коридор. Кылӧ бормашина шы.

Кӧнкӧ бӧрдӧ кага.

КИРИЛЛ. Молодеч! Озджык доймы?

ИРА. Оз.

КИРИЛЛ. Кынтісны ансӧ да сійӧн. Час пиньтӧ кыскасны — он и казяв. А то нярган. Ноко, видзӧдлы ме вылӧ. О! Кор он няргы, морт кодь тай быттьӧ.

ИРА. И тэ морт…

МЕДСЕСТРА: Ремизова!

КИРИЛЛ. Пыр.

МЕДСЕСТРА. Бать-мамкӧд.

КИРИЛЛ. Кытысь ме найӧс босьта?

МЕДСЕСТРА. А тэ? Шогман. Киыд ён? Отсалан кутны.

Кирилл да Ира пырӧны кабинетӧ.

Кабинетын.

ПИНЬ БУРДӦДЫСЬ. Таті доймӧ? А тадзи? Бур. Кыдзи шуӧны?

КИРИЛЛ. Менӧ Кирилл. А сійӧс — Ирина.

ПИНЬ БУРДӦДЫСЬ. Ира, вомтӧ эн пӧдлав. Кирилл, ковмас кыскыны куим пинь. Нёльӧдсӧ, витӧдсӧ да квайтӧдсӧ. Висьӧ буретш квайтӧдыс. Выль пинь. Мӧд кыкыс — йӧвпиньяс. Ерунда. На пыдди нин выльяс петӧны. Да ӧд, кага? Мый нӧ ті квайтӧд пиньсӧ эн видзӧй? Татшӧм пиньӧн кагалы овны оз позь. Паськыдджыка восьт вомтӧ. Ещӧ, Ира. Видзӧд, кутшӧм инструмент менам. Мича? Час ми тайӧн мичаторнас — хоп! — и кыскам нёльӧдсӧ… Со! Нёльӧд пиньыд.

ИРА. Угу.

ПИНЬ БУРДӦДЫСЬ. Вомтӧ эн тупкы. Витӧдыс. Со! Бӧрнас босьтан да шырпилы сетан. Тадз. А квайтӧд пиняс лекарство пуктам да кольлам на тэныд. Да, кага?

ИРА. Да.

КИРИЛЛ. А мый, талун некыдзи? Дась локтӧмӧн? Аски Трӧича. И ми бать-мамкӧд мунам пӧчлӧн гу вылӧ… Да ӧд, Ира?

ИРА. Да.

ПИНЬ БУРДӦДЫСЬ. Но-о-о… мый сэсся. Колӧ кӧ и колӧ. Сӧмын кутны ковмас чойтӧ. Тайӧ абу йӧвпинь. Вужъяссӧ бура нин лэдзӧма. Кирилл, кут.

Ира горзӧ.

ПИНЬ БУРДӦДЫСЬ. Кут, Кирилл.

КИРИЛЛ. Кута, кута.

ПИНЬ БУРДӦДЫСЬ. Ира, вомтӧ эн тупкы. Час, час, дитя. Ого, вужъясыс кутшӧм крепыдӧсь, но кыскыны ковмас, лёк пиньыс. Эн горзы, эн. Укол ӧд вӧчим.

Ира горзӧ.

ПИНЬ БУРДӦДЫСЬ. Ира горзӧ, мед повзьӧдны миянӧс. А ми огӧ полӧй. Да ӧд, Кирилл?

КИРИЛЛ. Ньӧти ог!

Коймӧд юкӧн

Кирилл да Ира гортаныс.

Кирилл лыддьӧ небӧг.

…Виччысьтӧг сійӧ нюммуніс и сьылӧмӧн мыйкӧ тшӧктіс вӧчны стражникъяслы. Найӧ лэдзисны шыяссӧ. Башняын радпырысь шыасисны барабанъяс. Тревога сигнал бӧрын ланьтлӧм мукӧд барабанъяс выльысь кутісны радпырысь жӧ шыавны. Нылыс корис миянӧс ас бӧрсяыс. Ми мӧдӧдчим сы бӧрся шы новлысьяс кытшын ема куст да башня костӧд. И тувччим ичӧт йӧзлӧн му вылӧ.

ИРА. Ме тшыгъялі.

КИРИЛЛ. Врачыс мый шуис? Кӧкъямыс часысь не водзджык. Терпит. Доймӧ? Пиньыд висьӧ?

ИРА. Нинӧм оз вись. Вир петӧ.

КИРИЛЛ. Сьӧлышт и вод.

ИРА. Врачыс пожъявны тшӧктіс.

КИРИЛЛ. Пожъяв либӧ. Пузьӧдӧм ваыс графинас, ачыд тӧдан. Пожъяв и сьӧлыштав. И пӧдлав менсьым ӧдзӧсӧс.

Ира мунӧ кухняӧ. Кылӧ стеклӧ жугалан шы.

КИРИЛЛ. Господьӧ-Енмӧ, мый лоис?

ИРА. Ме графинсӧ жугӧді. Киысь уси. Сьӧкыд зэв.

КИРИЛЛ. Тӧрыт вӧлі кокни, талун сьӧкыд? Сӧмын эн няргы.

ИРА. Да-а, тэ менӧ видан.

КИРИЛЛ. Ог вид. Ёна окота кывзыны няргӧмтӧ! Эн вӧрӧд стеклӧ торъяссӧ! Доймалан! Тырмас талун вылӧ вирыс… Тэ вомтӧ пожъялін?

ИРА. Эг. Сӧмын сьӧлышті.

КИРИЛЛ. Да эн нин бӧрд сэсся. Мун мыссьы — став чужӧмыд вирӧсь. Аслыд абу зывӧк? Кӧні корӧсьыс тайӧ керкаас?

Кирилл чышкӧ джоджсӧ да шыбитӧ стеклӧ торъяссӧ ведраӧ.

ИРА. Кӧсъян, ме джоджсӧ мыська?

КИРИЛЛ. Ещӧ мый? Мун да вод. Вод да лыддьысь. Ме тай куйлі да лыддьыси, эг сорась тэныд. Да ӧд?

ИРА. Мудзи. Синъяс мудзисны. Тэ лыддьышт.

КИРИЛЛ. Мый?! Мудзин кӧ синмыд, кывзы пельнад. Куйлы да кывзы.

ИРА. Ог кӧсйы нинӧм кывзыны. Ме пиньӧс кӧсъя пожъявны, содаӧн. Кыдз врачыс тшӧктіс. Содаӧн, а оз сӧмын ваӧн.

КИРИЛЛ. Гӧгӧрвои, гӧгӧрвои. Мун аслад жыръяд. Ме тэныд ставсӧ вая: и ва, и сода, и кӧструля.

ИРА. А кӧструляыс мыйла?

КИРИЛЛ. Медым сьӧлавны сэтчӧ, а не котравны ӧтарӧ-мӧдарӧ.

ИРА. Менам марлечкаяс помасисны.

КИРИЛЛ. Кутшӧм марлечкаяс?

ИРА. Кутшӧмӧс зубилкаас сетісны.

КИРИЛЛ. А менам терпенньӧӧй помасис! Босьт бинт да вундав сэтысь квадратикъяс, а сэсся кусняв найӧс нӧшта ичӧтик квадратикъяс…

ИРА. Петкӧдлы. Ме ог куж.

КИРИЛЛ. Тэныд сизим арӧс! Думышт! Сизим! Ме тэнад арлыдын некод дорӧ эг сирась. Ни батьӧ дорӧ, ни мам дорӧ. Ставсӧ кужи вӧчны ачым.

ИРА. Мама висьталіс тетя Галялы, мый тэнад сизим арӧснад вӧлі энурез. А менам некутшӧм энурез абу.

КИРИЛЛ. Тэнад ӧні лоӧ и энурез, и сколиоз, и син улад ыджыд лӧз. Мыськы чужӧмтӧ, кодлы шуӧма!

ИРА. Ме мыськи.

КИРИЛЛ. Сӧмын эн пӧръясь! Мунам!

Мунӧны мыссян жырйӧ. Киссьӧ ва. Кылӧ Кириллӧн гӧлӧс.

КИРИЛЛ. Бӧръяысь петкӧдла, кыдзи колӧ мыссьыны.

ИРА (котӧрӧн петӧ). Да ме мысси, мысси.

КИРИЛЛ (тшӧтш петӧ, петкӧдӧ шыран, бинт да кӧструля). Ладнӧ. Видзӧд, кыдзи колӧ вӧчны квадратикъяс. Видзӧд. Босьтам шыран. Бинт. Вундам шыраннас бинтсьыс ыджыд квадрат. Ещӧ ӧтикӧс. Еще. И уна-уна нӧшта. Сэсся босьтам ӧти ыджыд квадрат, куснялам сійӧс ичӧтик квадратик вылӧ. Тадзи, тадзи, тадзи. Восьты вомтӧ. Хоп! — и дой вылад. Гӧгӧрвоин?

ИРА. Ага.

КИРИЛЛ. Эн кӧ гӧгӧрво эськӧ! Ӧні ставсӧ тайӧс босьт да мун аслад жыръяд. Вод и виччысь менӧ. Мед татчӧ ныртӧ эз вӧв сюйӧма. А то! И ключит кутшӧмкӧ мультик.

Ира пырӧ аслас жырйӧ.

КИРИЛЛ. Пӧдлав ӧдзӧссӧ! Ира! Аттьӧ тэныд, мамук!.. Тетя Галяысь!.. Тайӧ чадӧсьыс! Менам мученньӧысь! Менам шуда челядьдырысь! (Корсьӧ сода.) Кӧні тайӧ керкаас содаыс? Ог кӧ аддзы, менам точно лоӧ кутшӧмкӧ энурез. И некутшӧм медиум оз отсав… Со! Со-да! Ва стӧкан вылӧ пань. Ме сылы вит стӧкан дасьта, сӧмын мед вӧл танкын моз — лӧнь. Вит оз артмы, но нёльыс абу жӧ лёк. Или нӧшта пузьӧдны? Ужнайтны ӧд ковмас мыйкӧ вӧчны. Сирасис тай… Ладнӧ, стӧканъяс кӧструляӧ… (Мунӧ Ира дорӧ.) Тэ мыйла он видзӧд мультиксӧ? О, Енмӧй, мыйла бара став чужӧмтӧ лякӧсьтін? Мун мыссьы! Бӧръяысь нин. Давай, давай котӧрӧн!

ИРА. Мунам ӧтлаын. Ме пола ӧтнам.

КИРИЛЛ. О да!

ИРА. Сэні пемыд.

КИРИЛЛ. Ещӧ мый думыштан? Ой, да он кӧ кӧсйы, эн мыссьы. Ёна колӧ! Вомтӧ пожъяв. Со ме тэныд васӧ мыйта вайи. Кӧструляас сэсся сьӧлышт. Давай!

ИРА (пожъялӧ вомсӧ). Зывӧк содаа ва.

КИРИЛЛ. Нинӧм абу зывӧк. Видзӧд ме вылӧ. (Пожъялӧ вомсӧ.) Ффуу! Зато буртор ваяс: пинсьыд вирыс оз кут петны.

ИРА. А кор дугдас петнысӧ?

КИРИЛЛ. Кутан кӧ тшӧкыда пожъявны, ӧдйӧ и дугдас. Первой соданас пожъяв, а сэсся ваӧн, мед оз восӧд. Гӧгӧрвоин? А ӧні квадратиксӧ пукты пиняд. Мультиксӧ ключита?

ИРА. Эн. Оз ков. Ме мудзи. Узьны кӧсъя.

КИРИЛЛ. Вот тайӧ бур. Узьны — тайӧ зэв буртор! Узьны — медся бурыс олӧмас. Узьны — бурдны. Узь! Асылӧдзыс кӧ узян, ме тэныд мороженӧй ньӧба. Медся донасӧ.

ИРА. Ог кӧсйы мороженӧй. Бисӧ ӧзты. Пола.

КИРИЛЛ. Коді олӧ биӧн, кор ывла вылас югыд?

ИРА. А меным пемыд. Ӧзты.

КИРИЛЛ (ӧзтӧ бисӧ). А ӧні югыд? Ме тэнсьыд юала — ӧні югыд?

ИРА. Югыд. Эн горзы — пельяс висьмасны.

КИРИЛЛ. Пиньыд оз доймы?

ИРА. Пиньыд оз. Мун…

Нёльӧд юкӧн

… Менам тырмис сямӧй тупкыны кияснам юрӧс, и ме лэби ваас водзлань юрӧн. Тадзи артмис и сы вӧсна, мый пигмейяс кутчысисны кокъясам. Ме пыри пӧшти ва пыдӧсӧдзыс. Висьталӧны, мый кор мортыс пӧдӧ, сылӧн став олӧмыс мунӧ син водзас. Ӧдӧбӧн мунысь киносъёмкаын. Ме та йылысь нинӧм ог тӧд, но ме лэби валаньыс да пыри ваас медся ӧдйӧ аслам олӧмын.

Звӧнок. Кирилл восьтӧ ӧдзӧс. Пырӧ Колька.

КИРИЛЛ. Мый тэныд колӧ?

КОЛЬКА. Лыддьысян?

КИРИЛЛ. Лыддьыся.

КОЛЬКА. Сэні.. пӧдружкаыд тэнад… Тэнӧ корӧ. Петан?

КИРИЛЛ. Абу менам некутшӧм пӧдружка

КОЛЬКА. Шуӧ, пӧдружка пӧ. Лабич вылын пукалӧ подъезд дорын.

КИРИЛЛ. Пӧрйӧдлӧны тэнӧ. Гӧгӧрвоан? Первойысь ли мый? Некыдзи он тӧлксяв. Компын разберитчин, а йӧзсӧ эн и велав гӧгӧрвоны.

КОЛЬКА. Да оз пӧръясь. Бӧрдӧ. Петав. Жаль ӧд. Сэні миян зонъяс дӧсадитӧны сійӧс.

КИРИЛЛ. Ладнӧ. Петала. Мед виччысьлас.

КОЛЬКА. Войӧдзыс мед виччысьлас? Супермен…

КИРИЛЛ. Да Ирка менам висьӧ. Ачыд жӧ висьталін. Видзӧдла, кыдзи сійӧ. Мун, ме локта.

КОЛЬКА. А… Но, сідзкӧ… (Петӧ).

КИРИЛЛ (восьтӧ ӧдзӧссӧ Ира жырйӧ. Шӧпкӧ). Ира, тэ узян?

Ира оз вочавидз. Кирилл петӧ патераысь.

Ывлаын.

КИРИЛЛ. Ну и?

КОЛЬКА. Мунӧма. Дӧзмӧдісны, кӧнкӧ, ёна. Аддзан, сквер дорас сулалӧ? Еджыд паськӧма.

КИРИЛЛ. Сиреневӧй, гашкӧ? Еджыднас тай некод оз тыдав.

КОЛЬКА. Но мед сиреневӧй.

ВИТЕК. Привет, Кирча. Ворсам аски волейболысь?

КИРИЛЛ. Видзӧдлам. Здорово, Витёк.

ВИТЕК. Видзӧда, тэныд волейболыд эм кӧть абу. Пӧдружка лӧсьӧдӧмыд.

КИРИЛЛ. Но сідз…

ВИТЕК. Ничего тай нывкаыс.

КОЛЬКА. Вот и эн во сыӧдз.

ВИТЕК. Тэнӧ кодкӧ юаліс? Вешйы, пока эз сюрав.

КИРИЛЛ. Ті лӧняджык вай. Менам кагаӧй узьӧ.

ВИТЕК. Со ӧд. Эз на гӧтрасьны, а кага нин эм.

КИРИЛЛ. Пӧдлав вомтӧ…

КОЛЬКА. Со, со! Миянлань локтӧ. Аддзан? Тӧдмалін?

КИРИЛЛ. Эг. Ладнӧ, муна тӧдмася.

Кирилл сувтӧ Катялы воча.

КАТЯ. Мый колӧ?

КИРИЛЛ. Тэ пӧ корсян менӧ.

КАТЯ. Ремизовыс тэ и эм? Сёр нин. Ме гортӧ муна.

КИРИЛЛ. Ме верма колльӧдны.

КАТЯ. Оз ков.

КИРИЛЛ. Ме, буракӧ, кольӧда нин… Мый месянь колӧ?

КАТЯ. Нинӧм нин оз. Коркӧ мӧдысь. Аски.

КИРИЛЛ. Да мыйла аски, кор позьӧ талун? Менӧ ӧд тэ вылӧ гӧтралісны нин. А тэ нинӧм он кӧсйы висьтавны… Да кытчӧ ми котӧртам? Ньӧжйӧджык оз позь?

КАТЯ. Ладнӧ. Тэ кутшӧм классӧ тестированиесӧ прӧйдитін?

КИРИЛЛ. Экономическӧйӧ.

КАТЯ. Бухгалтер?

КИРИЛЛ. Мыйла бухгалтер? Эг на бӧрйы.

КАТЯ. Сідзкӧ, тэныд веськодь? Верман и журналистикаӧ, и велӧдысьӧ?

КИРИЛЛ. Шуан жӧ — велӧдысьӧ!

КАТЯ. А мыйла либӧ та мында небӧг лыддян? Школа библиотекаса формулярын тэнад медся уна книга. И МБРК-ысь кык небӧгӧн вежон босьтан. Шӧркодя.

КИРИЛЛ. Шӧркодя, шуан, кык небӧг артмӧ. Колӧ жӧ! А кытысь тэныд татшӧм арифметикаыс?

КАТЯ. Сэтысь… Литератураысь тэнад вит, роч кывйысь — нёль. Сідз? И стӧч наукаясысь нёль.

КИРИЛЛ. Мыйла? Экзаменъяс ме стӧч наукаясысь сдайті. Факт! А факт, кыдз шуӧ менам бать, ныра факт.

КАТЯ. Да веськодь, мый экзаменъяс серти. Аттестатын нёльяс! Вот! А менам витъяс! А роч кыв да историяысь менам нёльясыс ылӧгӧсь. Мама вӧчис.

КИРИЛЛ. Ме тэнӧ мыйлакӧ дзик ог помнит. Тэ кодар ӧкмысӧдас велӧдчин?

КАТЯ. Да ме дзик мӧд школаысь. Миянлысь школанымӧс некод лицейӧн вӧчны эз мӧвпышт. Тэнад бать-мамыд банкын уджалӧны?

КИРИЛЛ. Тэнад и менам бать-мам вылӧ досье эм?

КАТЯ. Помалан школатӧ, мамыд ветлас банкса директор дорӧ. Сійӧ сетас университетӧ, экономическӧйӧ, направление.

КИРИЛЛ. Целевӧй сетас? И мый тэ менам мам йылысь сӧран?

КАТЯ. Ветлас, ветлас. Ставӧн найӧ котралӧны, кор пыкас. Кытчӧ колӧ и кытчӧ оз ков котралӧны. И тэ пыран велӧдчыны экономическӧйӧ, кӧть кык во пукалан гуманитарнӧй классын.

КИРИЛЛ. Мый тэнӧ менам олӧмӧй сэтшӧма…

КАТЯ. Ме аслам олӧм йылысь, Ремизов Кирилл Валентинович. Менам мамӧй оз уджав банкын. Сійӧ уджтӧмалысь, пособие вылын. А батьлы меӧдз некутшӧм мог абу.

КИРИЛЛ. Бать-мамъясӧн вежсьыны вӧзъян?

КАТЯ. Тэ ещӧ и сералан.

КИРИЛЛ. Ньӧти ог. Ме дзик нинӧм ог гӧгӧрво.

КАТЯ. Ме тшӧтш тіянлысь тестсӧ прӧйдиті. Баллыс эз тырмы. Тадз артмис. Мун пӧ гуманитарнӧйӧ. Сэн пӧ эм на ӧти места. Гӧгӧрвоин? Эн кӧ, мый тэныд вӧчны экономическӧйын? Тэ стӧч гуманитарий!.. Юрыд сӧмын мич вылӧ. Всё, воим. Выльлунӧ заявлениесӧ нуан?

КИРИЛЛ. Нуа.

Мунӧ тётя Зина.

КАТЯ. Видза оланныд, тетя Зина…. Видзаась.

КИРИЛЛ. Видза оланныд, тетя Зина. А тайӧ коді?

КАТЯ. Суседка. Пырам патераӧ. Сёрнитам сэні.

КИРИЛЛ. Кадыс абу.

КАТЯ. Но он кӧ патераӧдз пыр, кӧть ӧдзӧс дорӧдзыс колльӧд. Миян подъездыс стрёмнӧй, быдтор вермас лоны.

КИРИЛЛ. Но бур, кольӧда патераӧдзыд.

Пырӧны подъездӧ.

КАТЯ. Оз ков патераӧдз. Ӧшинь дорас сулыштам. Мый ми сёрнитім?

КИРИЛЛ. Юрӧй сӧмын мич вылӧ йылысь.

КАТЯ. Заявление йылысь… Шуам тадз. Вӧзйысь гуманитарнӧйӧ. А ме тэ пыдди экономическӧйӧ. А то вермас лёк лоны.

КИРИЛЛ. Ничёсе! Тэ тай тешкодь...

КАТЯ. Катя. Менӧ шуӧны Катяӧн. И ме ньӧти абу тешкодь. Ме дорӧ мамӧй сирасис… Мый тэныд, сьӧкыд? А кӧсъян, ме ачым заявлениетӧ нуа выльлунӧ? Кӧсъян? Тэ ӧні гижан, а ме нуа, мед тэнӧ не сьӧктӧдны вывті. Менам и бумагыс сьӧрысь, и ручкаыс. Со. Гиж. Кора индыны менӧ велӧдчыны лицейса дасӧд классӧ. И скобкаын — гуманитарнӧйӧ.

КИРИЛЛ. Да мыйла меным колӧ гижны. Мед кодкӧ мӧд гижас.

КАТЯ. Товарыш оз гӧгӧрво. Кодӧскӧ мӧдсӧ гуманитарнӧйяс оз босьтны. Миянлы комиссияас шуисны. Но эз веськыда, но век жӧ. Тэ вылӧ индісны. Адрестӧ висьталісны. Но, Ремизов, гиж.

КИРИЛЛ. А! Ме гӧгӧрвои! Тэ кӧсъян пырны экономическӧйӧ, медым сэсся экзаменъястӧг пырны университетӧ. Да?

КАТЯ. О Енмӧй! Гӧгӧрвоис Ремизов! Ми ог вермӧй вештысьны университетӧ пырӧмсьыс. Ми мамакӧд ёна гӧль йӧз.

КИРИЛЛ. Но вывті сюсь йӧз. А ог кӧ гиж заявлениесӧ? А оз кӧ кажитчы меным тайӧ няйт подоконникыс? А оз кӧ кажитчы меным тайӧ ставыс?

КАТЯ. Ладнӧ.

КИРИЛЛ. Эээ, мый лои? Эн лысьт пӧрччысьны!

КАТЯ. Кирилл Валентинович, тайӧ ог ме пӧрччысь, тайӧ тэ менӧ пӧрччӧдан. Тетя Зинасӧ помнитан? И сійӧ тэнӧ оз вунӧд. Ми сійӧс бӧрас судӧ босьтам свидетельӧн. Оз петитчы, чайта. Ӧні тэа-меа кутам мырдӧналан сцена ворсны мамлӧн вӧзйӧм серти. Да сулав!

КИРИЛЛ. Вешйы! Киястӧ вешты! Вешты, шуи, киястӧ!

КАТЯ. Час ме ещӧ горзыны кута. Йӧз чукӧртчасны. Тетя Зинаыд ӧтнас мый? Ме уна йӧз горзӧда. А сэсся тэнӧ полиция кутас кыскавны. И некутшӧм десятӧйӧ тэнӧ ни ӧти школа оз босьт.

КИРИЛЛ. Но горзы! Мый он горзы? Отсалӧй! Мырдӧналӧны!

КАТЯ. Ланьт! Весась! Оз ков меным нинӧм! Весась, мися, гуманоид гуманитарнӧй! Зунньы небӧгъястӧ!

НЫВБАБА. Катя! Тэ? Мый лои, нылукӧй? Час лэчча. Час, час! Отсалӧй! Мырдӧналӧны!

КИРИЛЛ. Бура думыштӧмныд!

КАТЯ (шӧпкӧ). Ланьт, Ремизов, криста ради, ланьт! Тс-с! Усйысям! Да ӧдйӧджык! Мый падмин?

Котӧртӧны.

Витӧд юкӧн.

Кирилл локтӧ гортас.

Кылӧ Иралӧн бӧрдӧм.

Кирилл ӧдйӧ пырӧ гортас, корсьӧ Ираӧс.

КИРИЛЛ. Ирка, ме локті. Эн бӧрд! Тэ кӧні? Мыйла сотчӧм дук кылӧ? Вот ме йӧй! Чайникыс сотчӧма… Да кӧні тэ, Ира? Тэ туалетын? Тэ мыйла томнасин? Восьт ӧні жӧ! (Кирилл тотшкӧ туалет ӧдзӧсӧ) Ира, менӧ тӧрӧпитӧ! Восьт, колӧк. Восьт!!!

Ира восьтыштӧ ӧдзӧс. Кирилл восьтӧ ставнас.

КИРИЛЛ. Мый лои? Ты мыйла вирӧсь ставнад? Тэ усин? Да? Ноко висьтав! Кыдзи тадзи позьӧ усьны? (Кирилл звӧнитӧ.) Скорӧй! Скорӧй! Тані кага, ставнас вирӧсь. Да ме ог тӧд. Ме сӧмын пыри. Сизим арӧс. Ира Ремизова, Чкалова 8, 50 патера. Регыдджык! Ме ог тӧд, мый вӧчны! Ирук, но эн бӧрд,эн бӧрд. Висьтав мый лоис. Лок ме дорӧ. Час ми тэнӧ мыськалам… (Мыссьӧдӧ Ираӧс.) Ваӧй, ваӧй, мыськы менсьым чужӧмӧс. Кӧдзыд? Кӧдзыд, дерт. Пӧсьсӧ ӧд дугӧдісны гожӧм кежлас. Терпитышт, Ирочка, терпитышт. Ме чайник йывсьыс дзикӧдз вунӧді. Став ваыс пакталӧма. А кӧдзыд ванас весиг киськасьны колӧ. Вир-яй винёвмӧдны. Кыдзи нин сэні. Мыссьыны ми кутам, асылын и рытын… Час вирӧсь паськӧмтӧ пӧрччам. Сӧстӧмӧс пасьталам. Тэ вом пытшкӧстӧ пожъявлін? Он кӧ кӧсйы, эн и вочавидз, сӧмын юрнад довкнит. Тэ кытчӧ? Восӧдӧ? Да? Да мый нӧ тайӧ татшӧмыс! Но, бурджык, кокниджык? Довкнит юрнад. Кыті тэнад висьӧ? Некыті оз? А вольпасяд, колӧк, вольпасяд водан? Вай ме тэнӧ ки вылӧ босьта, ме вылын мунам вольпасьӧдзыд.

ИРА. Меным кӧдзыд. Шебрӧд менӧ.

КИРИЛЛ. Ме тэнӧ плед пиӧ тубырта, но? Бӧрнас пасьтӧда. Час сӧмын вольпасьтӧ вежа, а то аддзан — ставыс лякӧссьӧма. Креслӧас пукышт, но?

ИРА. А ме ог кув?

КИРИЛЛ. Мый сӧран нинӧм абусӧ? Эн лысьт тадзи шуны!

ИРА. Менам юрӧй пасьмунас торпыригъяс вылӧ?

КИРИЛЛ. Но думышт ачыд, йӧюк, вермас ӧмӧй юр пасьмунны торпыригъяс вылӧ? Тэ татшӧм ыджыд нывка, а эскан быд нинӧм абуас.

ИРА. Менам син водзын ставыс бергалӧ, и сьӧлыштны окота.

КИРИЛЛ. Со тэныд кӧструля — сьӧлав мыйта кӧсъян. Аддзан кутшӧм мича юрлӧс кышӧд ме тэныд кышалі. Вишняяса. Вод. Вот тадзи. Шебрала тэнӧ, шоналан. Кӧсъян, ме тэныд небӧг лыддя? Ассьым?

ИРА. Кӧсъя.

КИРИЛЛ. Кывзы.

…Войнас ме пукалі и мӧвпалі сы йылысь, мый паныдалас Эвалиӧс сійӧ выль мирас, мый виччысьӧ сійӧс мираж сайын, — шонді да кодзувъяслӧн, тӧвъяслӧн да кӧдзыдъяслӧн муюгыдас. Ме кывзі дзоля войтырлысь барабан. Сійӧ корис Эвалиӧс. Видзӧді, кыдзи Эвали узьӧ да нюмъялі узигас. Сійӧс колӧ велӧдны лолавны. Ме гӧгӧрвои — сӧмын сійӧ петас челядьдырсянь тӧдса атмосферасьыс и сылӧн оз ло кислородлӧн двуокись, сійӧ пыр жӧ дугдас лолавны…

КИРИЛЛ. Оз кажитчы?

ИРА. Кодкӧ звӧнитіс.

КИРИЛЛ. Каститчис.

Звӧнитӧны ӧдзӧсас.

Квайтӧд юкӧн.

Пырӧ Бурдӧдысь.

БУРДӦДЫСЬ. Видза оланныд? Кӧні висьысьыс?

КИРИЛЛ. Татчӧ, татчӧ локтӧй, пӧжалуйста. Аддзанныд, ставыс вирӧсь — и юрлӧсыс, и кышӧдыс, и прӧстыняыс. Сійӧ, тыдалӧ, мыйкӧ ёсьтор кылӧдӧма и оз висьтась.

БУРДӦДЫСЬ. Лӧняджык. Час ставсӧ видзӧдлам. Восьты вомтӧ. Вирыс петӧ пинь гурансьыс. Став аныс гӧрӧма. Пиньяс нетшинныд, сідзкӧ.

КИРИЛЛ. Куим пинь. Врачыс шуис, вай пӧ талун кык йӧвпиньсӧ, а квайтӧдсӧ мӧдысь. А ме шуи — вай ставсӧ нин ӧти сайын. Вот. Ира унмовсис, а ме ывла вылӧ петі. Дыркодь эг вӧв. Сійӧ, тыдалӧ, мыйкӧ ёсьтор кылӧдіс, сы вӧсна мый кор ме локті, Ира восіс вирӧн унитазӧ. Уна вир петіс. Литр. А, колӧк, унджык. Унджык.

БУРДӦДЫСЬ Ме тшӧкті тіянлы ӧвсьыны. Некутшӧм ёсь тор нывкаыс эз кылӧд. Сідз ӧд, кагук? Узигас вира дульсӧ кылӧдалӧма. Бур, мый абу виньдӧма. А вирыс уна сы вӧсна, мый, буракӧ, сӧз йӧнгыляс инмӧмаӧсь. Тадз и гижлам: лимфоденит. Кымын час вирыс мунӧ?

КИРИЛЛ. Час квайт, сизим. (Шӧпкӧ.) Сійӧ ӧд оз кув?

БУРДӦДЫСЬ. Ӧні оз нин. Кӧні тіян бать-мамныд?

КИРИЛЛ. Найӧ аски асывнас воасны. Ті Ираӧс больничаӧ нуанныд?

БУРДӦДЫСЬ А кыдзи тэ чайтан? Вирсӧ уна воштіс. Вирыс вермас пежасьны. Водтӧдасны, чайта да, лоротделениӧ. Аски асыв верман стӧчмӧдны. Но вай пасьтӧд чойтӧ. Пасьтӧгыс ӧд он нуӧд.

КИРИЛЛ (Иралы). Час ме тэнӧ пасьтӧда. Тэ эн пов. Ставыс лоӧ бур, Ирук. Ставыс лоӧ бур.

ИРА. Эн бӧрд.

КИРИЛЛ. Ме ог бӧрд. Аски асывнас ме локта тэ дорӧ. Тэ эн пов, больничаас врачьяс да нянечкаяс шаньӧсь.

ИРА. Ме ог пов. А тэ эн бӧрд.

БУРДӦДЫСЬ. Валерьянка эм? Мун юышт. А Ирочкаӧс ме ачым пасьтӧда.

КИРИЛЛ. Дерт жӧ. Миян сӧмын свитер да колготки и коли пасьтавны.

БУРДӦДЫСЬ. Бур. Пасьтасьӧй да петӧй ывла вылас. Ме машинаас лоа.

Бурдӧдысь петӧ.

КИРИЛЛ. Со кутшӧм акань миян! Синтӧ вештыны он вермы. Час мыссьыштам… Бурдан, и ме тэнӧ чери кыйны аскӧд босьта. А то пыр кӧсйыся, кӧсйыся…

ИРА. Пыжӧн?

КИРИЛЛ. Войбыд кутам вуграсьны… Кутчысь бурджыка. Час машинаӧ петам. Виччысьӧны нин, колӧк. Тэ прӧстит менӧ, Ирук…

Сизимӧд юкӧн.

Петӧны ывлаӧ. Кирилл пуксьӧдӧ Ираӧс машинаӧ, машинаыс мунӧ.

Пемыдысь петӧ Колька, сэсся Катя.

КОЛЬКА. Аппендицит ли мый?

КИРИЛЛ. Тэ мый абу на гортад? Вой нин.

КОЛЬКА. Оз восьтны. А ключыс менам абу.

КИРИЛЛ. Катя, а тэ мыйла тані?

КАТЯ. Мыйлакӧ. Извинитчыны локті.

КИРИЛЛ. Извинитчин нин. Мун гортад. Мамыд майшасьны кутас.

КАТЯ. Ог мун.

КИРИЛЛ. Тадзи кыкӧн и пукаланныд?

КОЛЬКА. Тадз и пукалам.

КИРИЛЛ (Колькалы). Тэ, кӧнкӧ, эн на и сёйлы талун? Мунам ме ордӧ. Чай кӧть нин юам. Катя, колӧкӧ, заявленитӧ вай гижа.

КАТЯ. Оз ков, Кирилл.

КИРИЛЛ. Мыйла? Тэ ӧд шуин, мый таысь олӧмыд вермас кусны.

КАТЯ. Менам мамлӧн таысь олӧмыс вермас кусны.

КИРИЛЛ. Сідзкӧ, мунам ме ордӧ мамтӧ тэнсьыд мездыны кусӧмысь. Менам мамкӧд ставыс бур. Сылы веськодь, кодӧн ме лоа. Мед сӧмын эг матькы.

КОЛЬКА. А ме пусьысьӧн лоа. А мый? Шашлыкъяс кутас жаритны. Кӧрыс… мммм.

КИРИЛЛ. Ме Иркаӧс эг верд. Вунӧді.

КАТЯ. Ме тай шуи, юрыд сӧмын мич вылӧ. Ме кольӧм во кокӧс чеглі да больничаӧ веськавлі. Войнас чеччан — кынӧмыд сюмалӧ. Пемыд. Бӧрдны окота.

КИРИЛЛ. Тэ тӧдан, кӧні больничаас лоротделениеыс?

КАТЯ. Тӧда, дерт. Ме весиг тӧда, кыдзи пырны сэтчӧ.

КИРИЛЛ. Ме жӧ шуи — Ирка асывсяньыс нинӧм эз сёйлы.

КАТЯ. Сідзкӧ, прорвёмся! Куимнад!

КОЛЬКА. Сійӧс, колӧк, дзик мӧд больничаӧ нуисны?

КАТЯ. Видзӧдлам.

КОЛЬКА. Чипан тэнад эм?

КИРИЛЛ. Дзонь чипан абу. Эм окорочокъяс.

КОЛЬКА. Шогмас. Ме сылы сэтшӧм чипан духовкаын пӧжа!

КИРИЛЛ. Катя, тэ кытчӧ?

КАТЯ. Абу кытчӧ, а мыйла. Дзоридзьясла. Миян керка сайын дзоридзыс зэв уна. Нуам Иралы. Абу ӧд сӧмын няньӧн мортыс шуда. Гӧгӧрвоны колӧ, гуманитарийяс.

КОЛЬКА. А шуин, абу пӧдружка пӧ.

КИРИЛЛ. Пӧдружка, пӧдружка.. Лок, пусьыны менӧ велӧдан…

…Луныс катовтчис рытлань, кор помасис Эвалилӧн олӧм вӧсна сьӧкыд тыш. Эз кокниа пуксьы мираж. Ми бергӧдчим лунвывлань и мӧдӧдчим. Да эновтім ичӧт йӧзлысь да Эвалилысь мусӧ.