КЫВ

Кыв —
Чӧвлун...
Мыйта мӧвп сійӧ вермӧ чужтыны.

Кутшӧм джуджыд овлӧ чӧвлун юкмӧсыс...
Но кывйыд сыын вермас и не чужны.

Кыв —
Нимкыв.
Лыддян сійӧс ваӧ.
Юан-юан,
И быттьӧ визувлӧн везйысь мынан —
Сідзи личавлӧ лолыд.

Но шуӧм кывйыд мыйтаысь
Аслыд жӧ
Октылӧ
Лэч.

Кыв —
Туйбок турун вылын лысва.
Либӧ синва,
Кытчӧ йиджӧма кодлӧнкӧ шог,
А гашкӧ и, радлун.
Ӧтмында — шогыс и радлуныс...

Эзысь войтъяслы колӧ сӧдзӧдчыны лов пыр...
Ловлы колӧ сӧдзӧдчыны эзысь войтъяс пыр,
Мед чужны выльысь.
Лоны — кывйӧн.

Но лысвасӧ кӧ пыркнитас тӧвру?..

Кыв —
Ю.
Нэм бӧрся нэм ми гумлалам вежа васӧ.
Но мӧвпыштлам-ӧ,
Мый и тайӧ юыс вермас косьмыны,
Бырӧ кӧ сыын коланлуныс.

Ву берег дорӧ ме вужйӧда и вужйӧда пуяс.
Мед нэриник вужъяснас найӧ йитчасны пӧльяслӧн пуяскӧд...

Тэ колан менам пуяслы,
Лов пыр визувтысь ю.

А берегыс буждӧ и буждӧ...