* * *

Нинӧм лов вылын абу,
весиг ичӧтик тусь.
Кысь нӧ кывбурыс чужас?
Оз ӧд енэжсьыс усь.

Муслун кайӧма вӧрӧ,
корсьлі — вуджӧр ни орт.
Бабӧн садитлӧм кыддзыс
лои медматыс ёрт.

Талун арталі, кымын
коли чаль йылас кор.
Тӧвру пӧльыштіс найӧс,
лои гажтӧм и нор.

Мыйӧн чуймавны аски,
мыйӧн гажӧдны син.
Кучкас рос ӧшинь таскӧ,
сӧмын лолам оз ин.

Восьта синмӧс мӧдасув —
ывла югыд да чиг.
Еджыд платтьӧа ичмонь
бара дивуйтӧ сикт...