САНДРА

Сиа Л. Ануфриевалы

— Но тэ жӧ абу...
— Тэ тшӧтш абу, Сандра!
— Ме эм. Ме тан, ог кольӧм кадас ов.
— Да, да, ме тэнӧ кыла, Муса Сандра.
— Кӧть таысь... оз мӧй шызьыв тэнад лов,
И абу-м кӧсйӧм лэбны енэж эрдас
Да бал вылын моз бергалыштны сэн?
Тэ помӧдз видзӧд, кыдзи шонді бердас,
И мӧдысь
тайӧ здуксӧ козьнав мен...

— Мен бурджык тайӧс шуны гижан кывйӧн...
Тэ лыддян, и син во́дзад сувтас пыр
Сӧдз руа юным, кодлӧн шоныд сывйын
Важ керкаяса кӧдж и Кырув нырд.
Ме тэнӧ сідз жӧ сывъям босьта, Сандра,
И некытчӧ тэ меысь он нин мын.
И вой шыяссӧ козьнала тэн, Сандра,
И выль шонділысь олӧм пестан вын.

— Тадз оз ло! Оз! Ме стӧча тӧда ӧні:
Мед гижтӧма нин кыклы индӧм кад,
Ме лоа ӧтнам. Тэ сэк лоан кӧні?
И панлам-ӧ ми коркӧ ӧтув сад?
Тэ гижӧдын?
Ме пачын сійӧс сота
И овны тэнад вемӧсын ог мӧд!
Кӧть эськӧ выльысь радейтӧмсӧ вота,
Но кутшӧм дзуысь? Весиг ен оз тӧд.

— А колӧк, татшӧм радейтӧмыс нэмсӧ
Медсӧстӧм овлӧ, сӧмын сыын лёк,
Мый юрад кутан абусӧ и эмсӧ,
Но тіӧн тэчӧм мирӧ ме ог лок.
Кӧть мӧвпнам, Сандра, ме ӧд век тэ дорын:
Со шызьӧмыд, со лоин рыт кодь рам.
Став вӧрасногнад сибӧдчывны коран,
И сьӧлӧм туӧ, но оз кывзы сям.

— А петан туйыс тайӧ дзугсьыс абу.
Мед менӧ босьтас сьывъяс вына тӧв.
Тэ топӧдан сэк ассьыд тыртӧм кабыр,
Тэ горӧдчӧмнад торкан асъя чӧв.
И колян ӧтнад Шондіыслы воча.
И виччысян на мыйкӧ — лунтыр дик.
И пасйӧм кывсьыд кабалаыс сотчас.
И мӧд, и коймӧд — тадз жӧ лоӧ дзик.

— О мыйта тэын ворсан руыс, Сандра.
Ме шуны тайӧс морт кывйӧн ог куж,
Но тэ и тӧв ныр, тэ и би кыв, Сандра.
Вӧргормӧг, кодлӧн пыдын-пыдын вуж.
Ме ставсӧ тайӧс пессьысь лолӧн кыла
И сӧмын тэӧн ола лун и вой
Да корысь вер моз кысся тэлань Кывла,
Кӧть ачыд нин тэ ставнас восьса дой.

— А дой оз личав, лунысь лун пыр ёнтӧ,
И весиг унма турунысь оз лӧнь.
— А менсьым сьӧлӧм ӧти казьтӧм шонтӧ,
Кӧть татшӧмторйыд вермис вунны скӧнь.
...Кор струбаад тай видзӧдчим водз асыв,
И шуин тэ: сэн олӧ эзысь дзирд.
А ме эг эскы. Другысь быттьӧ вирд,
Син водзӧ петіс мыйкӧ сэтшӧм ясыд.

— И тайӧ вӧлі ловъяс йитысь пасӧн?
— Да. Кӧнкӧ, весиг ӧні сійӧ эм,
Но туйыс сылань, чайта, пырзис раскӧн.
И некод кӧ оз инды, ковмас нэм,
Мед воӧдчыны миян кодзув дорӧ,
И пондам сійӧс баййӧдлыны ми.
— А водзӧ? Водзӧ? Водзӧ висьтав, кора...
— И сійӧ лоӧ миян пони пи.