* * *

Шуштӧм талун му вылас и тӧла...
Локтан Тэ,
и меын садьмӧ радлун.
Сэки быттьӧ пыра тӧвся садйӧ,
Вуджӧръяс кӧн вералӧны чӧла —
Быд кок туйлӧн аслас сер и шылад.
Аддза сьӧлӧм — му пасьтаыс югыд.
Мед и руа берегдорыс мугыд,
Тэнӧ весиг сэтысь
Ловнам кыла.
Коркӧ Тэ он лок, и помтӧм лун
Мӧда гартны, быттьӧ мудзӧм тун.
Став му-васӧ бергӧда ме соддзын,
Тэнсьыд мыгӧр вайӧдла син водзӧ.
Бӧрдла, кодыр лолӧс личкӧ лёк.
Гажтӧм тадзи босьтлӧ зэра лунӧ,
Кодыр мӧвпӧй ас кӧсйытӧг мунӧ...
Сійӧ локтас.
Сӧмын Тэ он лок.