ПЫЖӦН КЫВТІГӦН ЗАРНИ КӦКИНЬКӦД СЁРНИ

— Кытчӧ югдіс туй тіян эзысь Вулӧн мыш вывті, куим мама-ныла?
— Путшкымдінӧ мог суис лун-мӧд кежлӧ ветлыны, зарни кӧкинь.
— Путшкымдіныд ыджыд сикт, код дорӧ нӧ сувтанныд, куим мама-ныла?
— Априк Палэй ныв ордӧ, асланым вир тусь дорӧ, зарни кӧкинь.
— Кутшӧм кывъяс пӧрччасны, аддзасны кор тіянӧс, куим мама-ныла?
— «Кысь нӧ татшӧм гӧсьтъясыс, локтӧ пырӧ керкаӧ», зарни кӧкинь.
— Мый нӧ пызан выланыс катасны бур гӧсьтъяслы, куим мама-ныла?
— Гӧрд чери тшытш катасны, мырпома йӧв, сола тшак, зарни кӧкинь.
— Мый йылысь нӧ сёрниыс гартчас Путшкым ю мозыс, куим мама-ныла?
— Важ олӧмас сунгысьлам, рӧдвужнымӧс казьтыштам, зарни кӧкинь.
— Мый нӧ кольӧ сёрниттӧг, дзебас кудйысь перйывтӧг, куим мама-ныла?
— Водзӧ югдысь олӧмсӧ сёрниын ог вӧрзьӧдӧй, зарни кӧкинь.

— Пу йывсяньыд тэныд сэн бура ылӧдз тыдалӧ, зарни кӧкинь.
— Став гӧгӧрыс тыдалӧ, уна вӧлӧк тыдалӧ, куим мама-ныла.
— Мыйся олӧм петкӧдчӧ толун векся Ву весьтын, зарни кӧкинь?
— Уна овмӧс йывмӧма, вунӧдісны пас туйяс, куим мама-ныла.
— Бурсӧ мыйкӧ вайӧ жӧ ойлун вына тӧв нырыс, зарни кӧкинь?
— Тусьсӧ лои кӧдзӧма, коркӧ мыйкӧ петалас, куим мама-ныла.
— Мый нӧ татшӧм олӧмас пыр на тэнӧ чуксалӧ, зарни кӧкинь?
— Выльӧн чужӧм шондіыс, лысва сора асылыс, куим мама-ныла.
— Ӧтмоза-ӧ шудлунсӧ быд лов вылӧ юкӧма, зарни кӧкинь?
— Кодлӧн мыйта сьӧлӧмыс шудсӧ вермас лэптыны, куим мама-ныла.
— Нэмӧвӧйся югыдас шуд ли шог нӧ вынаджык, зарни кӧкинь?
— Шудыс ачыс новлӧдлӧ, шогсӧ аслыд кыскавны, куим мама-ныла.
— Путшкымдін нин тыдовтчис, регыд тшукам берегӧ, зарни кӧкинь.
— Унаысь на ковмылас кывтны-катны тіянлы, куим мама-ныла.