СИНТӦМ

— Тан берегыс со буждӧма, вай надзӧн.
Сідз тувччам тайкӧ мунам вӧтын моз.
А мыйта вӧлӧк вуджӧма нин тадзи,
И весиг сэті, кӧні туй ни пос.
Но, эрдӧ петім...
Виддзыс — помтӧм-дортӧм.
И кольквиж саридз тані воштӧ ун.
Ми му выв гажас гӧсьтъяс, кӧть и кортӧм.
Но туйыс таті.
Мӧдлаті он мун.
Час, видзсӧ вуджам,
Сэсся пырам раскӧ.
А сэні татшӧм мичыд оз нин ло.
Тэ ловтӧ веж,
А сы коста ме аскӧд
Кӧть ки тыр дзоридз чукӧртышта, но?
Вай чышъянӧда. Кыдзи талун сотӧ.
А миянлы на мунны бура дыр.
Мед эськӧ зэрас.
Жарсьыс муыс потӧ.
... Но вуджам Ку да каям Катша кыр.
И пӧттӧдз шойччам кыркӧтш морӧс вылас.
Сэн вӧля,
Сэсянь синлы воссьӧ Ву.
Но туй помӧдзным миян зэв на ылын.

...Лун помассьӧ, а кыв на мен эн шу.
Мый тэ пытшкын, тадз некор ог и тӧдмав.
Кӧть, гашкӧ, лыдтӧм дивӧ олӧ сэн.
Тадз кык выв
Водзӧ кыссям ӧдва-ӧдва,
А нуны ставсӧ тайӧс вичмӧ мен.
Тадз астырӧн ме думайті, кор пондім
Ми матысмыны — мунны коли час.
И пуяс костӧд читкырасис шонді.
А сэсся дзикӧдз пемдіс лӧньӧм рас.
И воис юрӧ: узьмӧдчыны ковмас.
— Ме нуӧда! — сэк кылі. — Бӧрсянь лок!
И кывзыси. И вӧлись воссис ловнас.
И кок бӧрсяыс муніс менам кок.
Ме ӧні вӧлі синтӧмыс.
Но дивӧ!
Мый сы пытшкын, ме быттьӧ аддзи друг.
И туйыс вӧлі помтӧм — ва выв, йи выв.
Но морт кӧ мӧдіс, сійӧс нем оз дзуг.