ЛЭБАЧ

1.
— Кывлін, 
воліс ӧшинь дорӧ лэбач? 
Борд шыыс и колис. Ачыс лэбис, 
Быттьӧ эз и вӧвлы... 
Сетчис тӧвлы. 

Кывлін — 
Талун бара воліс 
Матысь либӧ ылысь... 
Вайис зарни тусьсӧ ловъя кывлысь. 

Кӧнкӧ, вӧр шӧр вӧрын олӧ сійӧ. 
Кыйсьысьлы оз шедӧдчывлы киӧ. 
Висьтав, мыйла ӧшинь дорӧ волӧ, 
Вӧр-ва гыдйын ассьыс нэм кӧ олӧ? 

Кытысь сылӧн мыгӧрыс мен тӧдса? 
Ичӧтдырӧ ыбӧсыс нин пӧдса, 
Кор да кытысь аддзылі ме — ог тӧд. 
Сӧмын кыськӧ югыд вӧт моз локтӧ. 

Босьтӧ ставнас вежӧрӧс и лолӧс, 
Вынйӧра, но авъя, быттьӧ лола, 
Мунас ме пыр — нуас весиг сьӧлӧм. 
Войт оз коль. И кольӧ сӧмын йӧла. 

Муысь, ваысь, турунысь да корйысь 
Ставсӧ выльысь меным ковмас корсьны — 
Ачымӧс, и муслунӧс, и ёртӧс, 
Сійӧ здуксӧ, кодыр овла бордъя!.. 

2.
Аски садьма — гӧгӧр еджыд лым. 
Тэрмасьӧмӧн ӧшинь дорӧ локта, 
Абу-ӧ сэн лэбач ёртлӧн кок туй, 
Морӧс пытшкӧй виччысьӧмсьыс пым. 

Абу, абу волӧма на, аддза, 
Кӧть и кадыс выль пӧв мӧдны дась, 
Сьӧлӧм кӧсйӧ чепӧсйыны тась... 
Ог тӧд, мыйла кута сійӧс тадзи. 

Кывлі, эм пӧ кӧнкӧ сэтшӧм туй, 
Кодӧс вуджысь мӧдас вордкыв тӧдны, 
Кыдзи тайӧ олӧмас не пӧдны. 
Важ йӧз шуӧм серти тайӧ — ву, 

Кодӧс тӧла бордъя лэбач видзӧ. 
Вуыс — помтӧм кад пыр мунысь пос. 
Весиг кодыр сійӧ дзикӧдз кос, 
Писькӧс выныс морт вежӧрӧ сидзӧ. 

Лэбачыс кӧ некор оз нин лок, 
Сытӧг овны велӧдча ме кыдзкӧ. 
Корся быдмӧг чуднэйджыкӧс кыськӧ. 
Кодлӧн пыста кодь жӧ вӧсни кок. 

Пукта ваӧ, шонді водзӧ лэдза, 
Дзиръя ӧшинь коля сылы жорк. 
Войнас кыла: стеклӧ кузя — торк. 
Крутӧ содйӧд тэрмасьӧмӧн лэчча. 

Волӧма ӧд! Кок туйыс со эм! 
Сідзкӧ, сійӧ чуткис ӧшинь таскӧ, 
Медым понді виччысьны нин аски, 
Аскомысь, и вояс чӧж, и нэм.

3.
Лэбачӧй локтіс тӧлыся войӧ, 
А ме эг узь — 
Лолӧй тырӧма дойӧн. 
Видзӧдлі пыдӧстӧм синмас, и сэки 
Кутшӧмкӧ лача сійӧ мен сетіс. 
— Мыйла тэ волывлан? — юалі сылысь. 
— Тӧда, тэ корсян юкмӧссӧ кывлысь. 
— Корся, но кӧн сійӧ: матын-ӧ-ылын? 
— Енэж да му костын, тӧдтӧм ю йылын. 
— Кыдз нӧ мен босьтны лов пӧткӧдысь васӧ? 
— Сьӧлӧмсьыд сӧдзӧд, — и шывкнитіс раскӧ.

4.
Еджыд лэбачыс эз на мун, 
Воис сьӧд рӧма лэбач кыськӧ. 
Кылі, кутшӧма менӧ кыскис, 
Кыскис сы дорӧ тӧдтӧм вын. 

Корси енэжсьыс тэнсьыд син, 
Кӧсйи юавны сӧмын тайӧс: 
Кыдз мен сьӧлӧмӧ тӧрӧдны найӧс, 
Доя радлуныс мед эз чин. 

Тадзи збыльысь мен кӧсйыссис сэк: 
Ог мӧд водзсасьны бордъя кык ловлы. 
Мед жӧ еджыдыс мыш сайын лоӧ. 
Сьӧдыс син водзын лоӧ мед век. 

5.
Вына лэбачӧй-кадӧй, 
Менӧ нуан тэ кытчӧ? 
Олӧм бергӧдысь кытшӧ 
Либӧ пыдӧстӧм вадйӧ? 

Вына лэбачӧй-кадӧй, 
Кӧні сэки тэ лоан, 
Кор ме дыр мысти воа 
Увланьюрасьӧм садйӧ? 

Кӧть нин здук сӧмын лолӧн 
Тэкӧд окота лоны, 
Вына лэбачӧй-кадӧй, 
Вына лэбачӧй-кадӧй. 

6.
Тані вӧр-пуыс лэбачлӧн мыгӧра, 
Сылӧн кокподйыс вӧсни да сьӧд. 
Том пу чукӧрыс — ичӧтик рӧд, 
Кияс лэптӧны шонді ыргӧнлань. 
Сӧмын найӧ оз бордъясьны лэбач моз, 
Енэж йирӧ кӧть ловнысӧ кыскӧ. 
...Ӧта-мӧднысӧ асланыс лыскӧн 
Найӧ дорйӧны чоюкъяс моз. 

Лоӧ мый, пуяс лэбны кӧ тась 
Другысь кӧсъясны, кыдз найӧс кутан? 
Мӧвпнад мыйта кӧть быдтін да тутін. 
Шыркйӧм гӧрӧдсӧ некыдз он разь. 

Коді сӧнъясысь вирсӧ нӧ юис — 
Асъя енэжыс баситчис — гӧрд? 
Эм-ӧ кӧсйысьыс сэтӧні мӧд, 
Мед тадз тэрмасис енэжсай юыс... 

Лоӧ мый, пуяс лэбны кӧ тась 
Збыльысь сяммасны? Чайтанныд — нинӧм? 
Кодкӧ чукӧстас найӧс кӧ нимӧн, 
Здукӧн жугалас сьӧлӧмлӧн чась.