ТОРЪЯЛӦМ

Тэнӧ ас дорысь лэдза кор,
Лоан сук йӧв кодь еджыд руӧн.
Либӧ байд пуӧн матын туан, —
Арнас гылӧдан зарни кор.

Гашкӧ, казьтывны понда сэк,
Кыдзи ыззьылін тувсов шорӧн,
Ӧзтлін енэжас рӧма мег,
Юлін шудлунсӧ дойкӧд сорӧн.

Кыдзи лэбачӧн волін, пыр
Дивӧ юӧръяс вайлін меным.
Тэтӧг дзоридз ме ог нин пырт,
Рытъя гажтӧмӧс медым венны.

Быттьӧ ичӧтик гожся вӧт,
Ӧтув кад миян тэкӧд лолі.
Тӧда олӧмсӧ и ог тӧд.
Прӧстӧ виччыся зэрлысь волӧм.