ЛОВ ДЗОРИДЗ

1.
Галина В.

Кӧнкӧ лов пытшкын менам эм ичӧтик жыр,
Пурпур гырничӧ сэтӧні овмӧдчис дзоридз.
Ӧшинь югыдлань мыччӧма нэриник ныр.
И ме мӧвпала дзоридзсӧ асывсянь сёрӧдз.

Сійӧ некор и некытчӧ сэтысь оз мун.
Весиг сэки, кор пазмунлӧ олӧмлӧн часьыс.
Интӧм лэбач моз вошлӧ сэк вемӧс и ун.
Кыла войбыд, кыдз кокъяссӧ пукталӧ часі.

Сійӧ ветлас то эстчань, то косалас бӧр.
Кутшӧм мог пӧртӧ олӧмӧ, кодкӧ мӧй тӧдас?
Тавой еджыдӧс-еджыдӧс козьналіс вӧр,
И ме вывтырнам уёвті лымъялысь вӧтас.

Сэні чужӧмӧс сотыштіс ёсь чиръя лым.
Тӧв ныр пӧльтіс, эз сет меным воськовтны водзӧ.
Ки-кок пиавліс, ловруӧй вӧлі кӧть пым.
«Тырмас, бергӧдчы!» — часі друг бовгӧдіс. Соддзӧ

Босьті тэрыба лымсӧ, мед эскӧдны скӧнь
Менсьым дзоридзӧс, сійӧ ӧд садьмис жӧ ӧні.
Восьті соддзӧс, кор вои. А лымйыс нӧ кӧн?..
Петі котӧрӧн ортсӧ, а кок улын — сӧнік.

И кор видзӧдлі асыввыв, чуймылі: «Чӧ-ӧ-в!» —
Менам ыпмунӧм вежӧрӧй воссьысьӧ гӧрдӧн!
Синмӧй вазьыліс сэки — мый енэж оз чӧвт.
Ӧдва кывмӧн сэк дзоридзӧй шуис: «Мый бӧрдан?»

2.
Л.

Видзӧдлы ӧшиняд — енэжас дзоридзыс кутшӧм —
Сир пемыд гӧгӧр, а сійӧ то зарниӧн сотчӧ!
Аддзылін лун шӧрнас выліас лэбалысь кутшӧс?
Катӧма дзоридзсӧ — пуктӧма кодлыкӧ соддзӧ.

Киыс кӧ асъядор мудзас, и — лёнькмунас увлань.
Дзоридзыс усяс сэк кад юӧ визувтысь шорӧ.
Енэжыс сутш кежлӧ — югыдыс бырлӧ да — кувлас.
Вӧр сайысь мӧд дзоридз петас — син лыс пырыд ёрӧ.

Вӧр сайысь мӧд дзоридз мыччысяс — ёрӧмӧн ёрӧ.
Воддзаыс ва ньылыд кылалӧ — тайкӧ чӧж-пӧтка...
Кытчӧкӧ воас ӧд, тӧдӧмӧн, шӧрӧ ли дорӧ,
Видз весьтысь зарни бус лов тырӧн бобув моз ӧктас.

Вой шӧр вой видзӧдла: дзоридзӧй восьтӧма розсӧ —
Лайкъялысь поскӧдыс катӧмны пемыдлӧз йирӧ —
Синъясным паныдӧн лолӧны — разьӧмны поссӧ! —
Муслунӧй ылькнитлас чукйӧн и кӧдзавлас вирӧй.