КЫВБУРЪЯС

Кывбуръяс пессьӧны кӧтасьӧм корйӧн —
Лэбӧмны сад йӧрысь ичӧтик борйӧ,
Мудзтӧдзныс тӧв йылын венӧмны унсӧ,
Ланьтӧмны сэсся со — синъясныс куньса.

Чукӧрта содз тыр да аскӧдӧ вая —
Кодӧскӧ — гож водзӧ, кодӧскӧ — сайӧ.
Лоӧны бобув кодь кокньыдӧсь ӧтнив,
Ышловзяс ывла — и оз коль ни ӧти.

Мӧд вонас вӧтӧн моз воасны найӧ:
«Миянӧс ловзьӧд да вемӧсӧдз вайӧд.
Мӧвпышты платтьӧ — мед мичсьыс на мича.
Ми сійӧс йӧз дорӧ петавны видзам».

Кывбурлы — платтьӧ!.. Ме ветлі ю сайӧ,
Быдсяма дзоридзсӧ моздор тыр вайи,
Лысва моль ӧктышті югзьӧдны дорсӧ,
Медым быд войтын лунъюгыдыс ворсӧ.

Кайлі ме кыр йылӧ ловрула сылы,
Тӧлӧн мед лолыштас ойбыртӧм ывла...
Муслун кӧ нӧшта...
Да неыджыд сьӧлӧм!

Корси... а сійӧ нин тэ пытшкын, вӧлӧм.