ЮЯСЛӦН СЬЫЛАН

Ті менам юяс, пыс кодь дзоля юяс,
Ті менам ловлы радлун вайысь мич.
А шогыд, овлӧ, висьтасьтӧгыс суас,
И таысь некод миянӧс оз видз,

А тіян эзысь чирйӧн ворсысь ваныд
Збыль вежа нимкыв тӧдӧ али мый? —
И ме нин мӧвпнам ката визув паныд,
И пелыс улам Сӧдзим, Путшкым, Ы.

Став юыс ме пыр мунӧ тайӧ здукас.
И быттьӧ найӧ — менам олӧм сӧн.
А кодкӧд сэсся шогъясӧс ме юка?
И чужанінысь ӧтдор юка кӧн?

Ті визувтӧй и сьылан меным сьылӧй.
Мед кывзас мекӧд ӧттшӧтш парма-вӧр.
Мед тӧвру нулас сьыланкывсӧ ылӧ,
А сэсся коркӧ ваяс татчӧ бӧр

И лӧня пуктас эзысь пыжлӧн бӧжӧ
Да небыдика лайкӧдыштас здук.
А сэсся шонді лунсьӧмӧснас пӧжас,
А зэрыс удас сылысь бан и гуг.

И рытъя лэбач сьыланкывсӧ аддзас
Да коз пу йылӧдз качӧдчылас звирк.
И мӧвпыштас: да кутшӧм татшӧм чача,
Мый сьӧлӧм — тайкӧ гымай водзын вирд.