ЛЁША

1.
Алексей Крюковлы,
Украинаын усьӧм том мортлы.

Бӧръя здук. И дерт жӧ, тэ эн удит,
Весиг мӧвпнад Ву вылӧ эн во.
Мый нӧ вӧчан — татшӧм кӧ нин пудйыд,
Водзӧ тэнад тулысыс оз ло.

Лёша... Лёша... Югыд лола мортӧй,
Кӧджысь петӧм миян зарни пи.
Код нӧ татшӧм олӧм туй тэн вордіс,
Томӧн-бурӧн медым сотіс би.

Ӧти кадӧ мыйта тэ кодь зонмӧс
Кӧдзыд сывйӧн кутліс ӧтдор му.
А вӧйналӧн оз и тыдав помыс.
Луза бӧрдӧ, Визин, Изьва, Ву.

Чужан муӧ быд лун воӧ юӧр,
Шогӧн тыри бать-мамъяслӧн лов.
Кытысь водзӧ олан руыс сюрӧ,
Шогсьыс кор и шондіыс оз ков.

2.
Украинаын вӧюйтысь удораса зонъяслы.

Тулыс, Лёша*, тулыс... а тэ узян.
Пеж война эз помассьы на, эз.
Воалӧны чужанінад юсьяс,
Ваыс корсьӧ йи куд улысь мезд.

Тӧрыт тэнад сиктысь война вылӧ
Муніс Ӧндрей, менам ичӧт вок.
Маті вӧрын пыста тёльгӧ-сьылӧ:
Суис зонмӧс кывкутана мог.

Лёша, чеччы! Дорйы сыкӧд ӧттшӧтш
Чужан мулысь дзоридзалысь бан.
Вуджӧй, пиян, тшына кадсӧ кӧттшӧб...
Тіянӧс пыр виччысьӧны тан!