* * *

Сьӧлӧмыд на колӧ буретш татчӧ.
Из пыр мунны шуӧма кӧ — мунан.
Пыжъяс талун ныр кутӧны катчӧс,
Мӧдӧмаӧсь визув паныд уна.

«Босьтӧй менӧ аскӧдіныд, пыжъяс!» —
Горӧда, а найӧ — лэбач котыр!
Сьӧлӧм рӧчӧй на бӧрся кӧ пышъяс,
Суӧдас-ӧ... Суӧдас кӧ, кодыр?

Удитӧдчис сӧвны бӧръя пыжас,
Полӧмпырысь видзӧдліс ас гӧгӧр,
Быттьӧ сійӧ ставсьыс медся мыжа...
Другысь пӧртчис вӧрлань лэбысь кӧкӧ.

Шыасьліс со эстӧн, эстӧн, эстӧн —
Нюръяс вомӧн лэбӧ, сук вӧр пиӧд.
Зарни рыт нин алӧй кыа пестӧ —
Сылы колӧ вуджны шонді биӧд.