ВИЗИН РАЙОНУВСА СЕЛЬСКОКӦЗЯЙСТВЕННӦЙ ВЫСТАВКА

«Нянь воӧм» (Урожай) праздник кежлӧ (14-ӧд лунӧ сентябрын) Визинын лӧсьӧдӧма вӧлі 2-ӧд с.-к. выставка. Выставкасӧ восьтісны «Семен лунӧ» (праздник). Йӧзыс локтӧмаӧсь вӧлі зэв уна, быдсӧн мукӧд вӧлӧсьтъясысь.

Выставка вылын вӧлі уна пӧлӧс петкӧдланторъяс: видз-му уджалӧм йылысь, с.-к. машинаяс, скӧт видзӧм йылысь, пуктасъяс йылысь да уна мукӧдтор. Бурджыкыс да унджыкыс став петкӧдлантор пытшсьыс вӧлі видз-му уджалӧмысь да с.-к. машинаясысь.

«Нянь воӧм» праздник кузя торжественнӧй заседанньӧ бӧрын воссис выставка. Первойсӧ выставкаыд эз вӧв лючки сувтӧдӧма: йӧзыс вӧлі зэв уна, быдӧнлы окота видзӧдлыны; пырисны да разӧдчисны — выставка вылас висьтавлысьяслы зэв вӧлі сьӧкыд уджавны, этшанад некытчӧ вӧлі оз тырмыны.

Лун шӧр бӧрын лои пӧрадок. Сы бӧрти выставка помӧдзыс йӧзыс пырис-петіс зэв бура; крестьяна бура видлалісны петкӧдланторъяссӧ: мукӧдсӧ ёна сералісны, мукӧдсӧ ошкисны. Визингӧгӧрса крестьяна гӧгӧрвоӧны выставкаясыслысь бурлунсӧ.

Вӧлі выставкалӧн и омӧльторъяс: этша уджалісны с.-к. машинаяс, абу лючки вӧлі лӧсьӧдӧма местасӧ (павильон) скӧтлы, этша вӧлі висьтавлысьыс петкӧдланторъяс йывсьыс.

Выставка вылас сетісны премия комын петкӧдланторлы деньгаӧн (ставсӧ сеталісны 85 шайт), уналы сетісны дипломъяс (свидетельствояс).

Выставка вылӧ унджыкыс вӧлісны крестьяна: Визинса да мукӧд вӧлӧсьтъясысь. Ставыс кык лунӧн волісны 1139 морт, сы пытшкысь крестьянаыс 962 морт, служащӧй 46 морт, велӧдчысь йӧз 153.

Мӧд луннас выставка тупкысис 2 часын. Выставка вылас петкӧдланторъяс серти да крестьянаӧн ошкан сёрни серти ми аддзам — татшӧм бурторъяссӧ колӧ вӧчлывны быдлаын паськыдджыка да унджыкысь.

Горохов.