МОРДІН ВӦЛӦСЬТЫН (КУЛӦМДІН УЕЗДЫН)

Мордін вӧлӧсьт пасьта муніс сӧветӧ бӧрйысьӧм. Бӧрйысьӧм вылас крестьяна омӧля на волісны: сӧмын 38 прӧчент. Нывбабаяс зэв жӧ на омӧля волӧны бӧрйысьӧм вылад. Ставсӧ сӧветас бӧрйисны 22 мортӧс; на пиын сӧмын ӧти нывбаба.

Сентябр 23-ӧд лунӧ вӧлі сӧветъяслӧн чукӧртчылӧм. Сэні сёрнитісны уездувса исполком удж йылысь. Уисполкомлы шуисны: мед водзӧ вылӧ уисполкомыс Лӧкчимса допризывникъяслы призывнӧй пункт лӧсьӧдас Сыктывдінкарӧ. Сэсся мед ёнджыка видзӧдлас Лӧкчим вожса туй вӧчӧм вылӧ. Вӧлӧсьтувса исполком удж йылысь шуисны: сійӧ пӧ аслас вын серти уджалӧма, вӧлӧсьтувса олӧмсӧ гӧгӧрбок видзӧдӧма. Кытсюрӧ вӧлӧма шыльыдтӧминъяс: ӧнӧдз на абу разӧдалӧма вот мынтан листъяс.

Йӧзлысь дзоньвидзалунсӧ видзӧм кузя исполкомыс дай пельшӧр-бабкаыс старайтчӧмаӧсь. Сӧмын лекарствояссӧ карсяньыс мукӧддырйиыс абу кадын сетлӧмаӧсь. Выль бӧрйӧм йӧзлы тшӧктісны ставсӧ тайӧс веськӧдны. Шуисны — медым ёнджыка видзӧдласны лекарствояс судзӧдӧм вылӧ, пӧжарнӧй удж лӧсьӧдӧм вылӧ. Шуисны корны Даньса школаӧ учительӧс.

Бӧрйисны выль состав исполкомас да ревизионнӧй комиссияас — зэв сюсь йӧзӧс.

Газетӧ гижысь.