ВИДЗ-МУ УДЖАЛАН МАШИНАЯС ЙЫЛЫСЬ

Видз-му уджалӧм миян СССР-ын крестьяна пыр ӧтарӧ зільӧны бурмӧдны да паськӧдны. Сы вӧсна найӧ судзӧдалӧны машинаяс. Видз-му уджалан машинаястӧ крестьяна зэв корӧны, зільӧны босьтчыны машинаӧн уджавны.

Весиг миян коми крестьяна нин аддзисны став бурлунсӧ да кокньыдлунсӧ машинаясӧн видз-му уджалӧмысь. Лыддян кӧ газет, пӧшти быд номерысь аддзан: сэні крестьяна кӧйдыссӧ машинаӧн весалӧмаӧсь, сэні машинаӧн ытшкӧмаӧсь, сэні няньнысӧ машинаӧн вартӧмаӧсь.

Сы вӧсна миян правительство зільӧ видз-му уджалан машинасӧ унджык лӧсьӧдны. Сідз, 1923−24 воын став СССР пасьта машинаяс вузавлісны 24.925 сюрс шайт дон, 1924−25 воын 56 миллион шайт дон (кык мында дорысь унджык). 1925−26 воын став СССР пасьта кӧсйӧны разӧдны видз-му уджалан машинаяс (тракторъяс кындзи) 130 миллион шайт дон. Тайӧ дон вылас кӧсйӧны вузавны быдсяма сикас видз-му уджалан машинасӧ 1.300 сюрс кымынӧс: 929 сюрс плуг, 103.600 кӧйдыс весалан машина, 45 сюрс кӧдзан машина, 57 сюрс нянь вунданъяс.

Та кындзи ӧд миян сиктъяс корӧны ещӧ машина, кутшӧмӧс войдӧр эз на и тӧдлыны, код йылысь войдӧр весиг эз кывлыны. Тайӧ машинаыслӧн нимыс — трактор.^Миян обласьтын ӧти трактор эм жӧ нин. Таво неважӧн на вайисны Сыктывдінкарӧ./^ Ӧні миян Союз пасьта ставыс уджалӧ 11.187 трактор. 1925−26 воын кӧсйӧны сетны крестьяналы 13.350 трактор. Та серти ми аддзам — крестьяна ёна корӧны видз-му уджалан машинаяс.

Та вӧсна сӧвет власьт крестьяналы унджык машинаяс сетӧм вӧсна уна пӧлӧс уджӧ кутчысьӧ: 1) содтӧ видз-му уджалан машина вӧчӧмсӧ асланым промышленносьтӧ; 2) зільӧ вӧчны бур да ён машина, медым эськӧ сійӧн дырджык крестьяниныс вермис уджавны; 3) босьтчӧ донтӧммӧдны машинаяссӧ да бурджыка сувтӧдны сьӧм удждысян удж машинаяс лӧсьӧдӧм вылӧ; 4) кутшӧм деревняясӧ ыстасны тракторъяссӧ, сэтчӧ восьтывны курсъяс тракторъясӧн крестьянаӧс вӧдитчыны велӧдӧм кузя. Быд трактор вылӧ чайтӧны велӧдны кык крестьянинӧс тракторнас вӧдитчыны. Он кӧ ӧд велӧд крестьянинтӧ вӧдитчыны, тракторыд пыр кутас жугавлыны дай бурыд сыысь этша; 5) тшӧктӧма кооперативъяслы бурджыка сувтӧдны машинаяс судзӧдан уджсӧ.

Крестьяналы, сельсӧветъяслы, коммунист ячейкаяслы аслыныс колӧ босьтчыны бурджыка лӧсьӧдны машинанас видз-му уджалӧмсӧ, машина лӧсьӧдӧмсӧ. Та кузя колӧ дона машина лӧсьӧдігӧн крестьяналы ӧтувтчавны машиннӧй тӧвариществоясӧ.

Дона машина ньӧбтӧдз (трактор-ӧ, вартан машина-ӧ) войдӧр колӧ сёрнитлыны агрономкӧд, медым ньӧбан машинатӧ да весьшӧрӧ оз куйлы.

Сельскокӧзяйственнӧй кооперациялы машина ньӧбигӧн колӧ ёна видлавны сылысь ёнлунсӧ да шогманлунсӧ, лӧсьӧдны машина ломтансӧ.

Павлычев.