МЫЙЛА ШЫЗИСНЫ ГЫРЫСЬ ГОСУДАРСТВОЯС

Тайӧ вежонас Чичерин ёрт (миян народнӧй комиссар мукӧд государствояскӧд уджъяс нуӧдысь) петіс отпускӧ. Отпусксӧ коллявны сійӧ муніс заграничаӧ. Медвойдӧр сувтліс Варшаваӧ (Польшалӧн столича). Чичерин ёртӧс польшаса правительство бура встречайтіс-примитіс. Та понда ӧні шызисны уна мукӧд государствояс, медся ёна сэтчӧс капиталистъясыс. Германияын спокойнӧджыка на кыдзкӧ сы вылӧ видзӧдӧны. А Францияын ёна нин беспокоитчӧны. Медъёнасӧ шызьӧма Англия.

Мыйла нӧ сэтшӧма шызисны англияса буржуйяс Чичерин ветлӧмысь?

Англияса правительствоын юралысьяс зільӧны Чичеринлысь Польшаӧ волӧм йылысь делӧсӧ мӧдарӧ бергӧдны: быттьӧкӧ Сӧветса Республикаяслӧн Союз (СССР) кӧсйӧ кыскыны асланьыс Польшаӧс да ӧтвылысь повзьӧдӧмӧн падмӧдны (торкны) Германияӧс гарантийнӧй договор нуӧдӧм йылысь.

Сумасшедшӧй сӧмын вермас тадзи лӧсьӧдлыны, быттьӧкӧ Польшакӧд бурӧн олӧмыс СССР-лы колӧ сійӧн, медым торксяс миян Германиякӧд волысьӧмным (отношения), да быттьӧкӧ СССР усьӧдны (ыштӧдны) кӧсйӧ Польшаӧс Германия вылӧ.

Миянлы (СССР-лы) Польшакӧд бура олӧмыс колӧ дзик збыльвылӧ бура олӧм кузя, кутшӧм олӧм колӧ и Германиякӧд, некутшӧм повзьӧдлӧм ни усьӧдӧм тані абу. Колӧ шуныс дзик мӧдарӧ: СССР-а-Польшаа кост лёка олӧмыс вермис эськӧ сюйны Германияӧс тшӧтш кыпӧдчыны СССР вылӧ войнаӧн (кодӧс лӧсьӧдӧны пыр буржуйяс, медся ёна Англия); сыысь эськӧ быдӧнлы лои толькӧ ӧти лёк, медся ёнаыс — Германияыслы аслыс.

Сэсся миян Польшакӧд бурӧн лӧсьӧдчӧмысь вермас слабитны да орны буржуйяслӧн СССР гӧгӧр лӧсьӧдӧм кытшыс (блокада).

Видзӧдны, кыдзи кутас вочасӧн оръясьны буржуйяслӧн зэвтӧм везйыс Чёрнӧй моресянь Балтийскӧйӧдз, дерт, оз во сьӧлӧм вылас налы — сійӧ ӧд кутас киссьыны уна воӧн стрӧитӧм-дӧзьӧритӧм кытшныс налӧн миян гӧгӧр.

Сы вӧсна и шызисны озыръяс.