КОЛӦ ЛӦСЬӦДЧЫНЫ ДЕЛЕГАТКАЯСӦС БӦРЙЫНЫ

Кутшӧм делегаткаясӧс колӧ бӧрйыны

Октябр тӧлысь помлань Сыктывдінкарын да маті деревняясас кутасны бӧрйыны делегаткаясӧс.

Таво делегатскӧй собранньӧыс лоӧ ӧкмыслаын: Сыктывдінкарын, Читын да Кӧджпомын (ӧтлаалӧмӧн), Кырулын, Выльгортын, Слӧбӧдаын, Сёськаын, Зеленечын, Маджаын, Доддзын да Сыктывдін помын. Сыктывдінкарын делегатскӧй собранньӧясас кутасны уджавны служащӧйяслӧн гӧтыръясыс, слугаяс да профсоюзса нывбабаяс. Крестьянка костысь бӧрйыны кутасны дас мортысь ӧтикӧс. Профсоюзса шленъясысь да служащӧй гӧтыръяс пиысь — вит мортысь ӧтикӧс.

Колӧ эськӧ ёнджыка коммунисткаяслы да шефкомиссияяслы висьтавлыны крестьянкаясыслы — медым локтасны ставныс делегаткасӧ бӧрйыны, медым ӧти нывбаба весиг эз коль бӧрйысянінӧ волытӧм.

Бӧрйыны колӧ сэтшӧм нывбабаясӧс, кодъяс сулалӧны сӧвет власьт дор да кодъяс кутасны волывны быд собранньӧ вылӧ, медым эськӧ во чӧж удж нуӧдӧм мысти наысь артмис бура уджалысь, общественнӧй олӧм лӧсьӧдысь. Оз ков бӧрйыны важ делегаткаясӧс, эз кӧ найӧ уджавны, эз кӧ волывлыны собранньӧ вылӧ. Сэтшӧмыд сӧмын кутас прӧста местасӧ кутны, мешайтны мукӧдыслы уджсӧ нуӧдны. Колӧ бӧрйыны кымынкӧ прӧчент важ делегатка письыс, кодъяс бура уджалісны кольӧм во, волывлісны быд собранньӧ вылӧ, велалісны общественнӧй удж нуӧдны — сэтшӧмъясыс вермасны сетны ыджыд пӧльза выльысь бӧрйӧм йӧзыслы. Выльясыс важ вылас видзӧдӧмӧн кутасны асьныс ёнджыка уджавны. Важ водзмӧстчысь делегаткаясыс отсаласны нуӧдны уджсӧ и удж нуӧдысьясыслы.

Таво оз кутны босьтавны делегатскӧй собранньӧ вылӧ бӧрйытӧм нывбабаясӧс. Войдӧр вӧлі: кодлы окота уджавны — сылы и сетӧны делегаткалысь права да делегатскӧй билет.

Таво оз ло сідзи. Дерт, некод оз кут крестьянкаӧс собранньӧ вылӧ волӧмысь да кывзӧмысь, сӧмын оз кутны найӧс лыддьыны делегаткаӧн.

Виттор Наталь.