ЛӦСЬӦДЧӦНЫ СИКТЫН УДЖАЛӦМ ВЫЛӦ

Ӧні Гӧрд армияысь петӧны гортаныс 1902 вося гӧрдармеечьяс. Уна сюрс гӧрдармееч муналӧны асланыс сиктъясаныс.

Велӧдісны-ӧ найӧс Гӧрд армияын сиктъясын удж нуӧдӧм вылӧ? Вермасны-ӧ гӧрдармеечьяс асланыс сиктын босьтчыны обществоса удж бердӧ?

Гӧрд армияын тавося тулыссянь нин армеечьясӧс велӧдісны сиктын уджалӧм вылӧ. Гӧрдармеечьяс ёна тӧдмасисны комсомол уджӧн сиктын, тӧдмалісны, кутшӧм ногӧн колӧ уджавны вӧлӧсьтувса да сиктъясувса сӧветъяслы. Велӧдісны кооператив йылысь, кыдзи сылысь уджсӧ сиктъясын колӧ лэптыны.

Тайӧ удж вылас гӧрдармеечьяс асьныс зэв сьӧлӧмсяньыс босьтчӧны. Шойччиганыс, прӧст кадъясӧ пыр найӧ тӧдмасьӧны сиктъясын уджалӧм йылысь. Чукӧрӧн-чукӧрӧн, ӧтувтчӧмӧн тӧдмасьӧны Сӧветъяс 3-ӧд Съезд шуӧмъясӧн. Унаӧн кружокъясын велӧдчӧны кооперативъясын уджалӧм вылӧ, мукӧдыс сӧветъясын уджавны, кодъяс лыддьысян керкаын удж нуӧдӧм вылӧ, кодъяс газетӧ гижны велӧдчӧны.

Партийнӧй гӧрдармеечьясӧс да комсомолечьясӧс велӧдӧны, кыдзи коммунист партия крестьяна пӧвстын уджсӧ нуӧдӧ, кыдзи колӧ сувтӧдны уджсӧ партия ячейкаяслы. Татшӧм велӧдӧмсӧ кывзыны волӧны тшӧтш ас вӧлясьыныс беспартийнӧй армеечьяс.

Ӧткымын Военнӧй Округын Пошта да Телеграф Комиссариат восьталіс курсъяс пошта вылын уджавны велӧдӧм вылӧ. Сэні велӧдӧны вежӧраджык да сюсьджык гӧрдармеечьясӧс. Курсъяс вылас велӧдчӧм мысти найӧс пырысьтӧм-пыр ыстасны сиктъясӧ поштӧвӧй отделенньӧясӧ.

Сэсся Государственнӧй Издательство кӧсйӧ лӧсьӧдавны вӧлӧсьтъясын книга вузаланінъяс. Татчӧ ковмасны уна сюрс грамотнӧй, тӧлка йӧз. Татшӧм йӧзсӧ бара жӧ сетас Гӧрд армия. Сэні гӧрдармеечьяс татшӧм удж вылас велӧдчисны.

Сідзкӧ Гӧрд армия кужис велӧдны гортӧ петысь гӧрдармеечьясӧс сиктъясын удж нуӧдӧм вылӧ. Колӧ сӧмын кужны армияысь петӧм ёртъяслы сетны удж, индыны удж вылӧ.