ДОЛЫДА КОЛЛИМ «НЯНЬ ВОӦМ» ПРАЗДНИК

Айкатыла вӧлӧсьтын сентябр 21 лунӧ чукӧртчыліс исполком дорӧ митинг вылӧ морт 300 саяс: нывбабаяс, мужикъяс, том йӧз. Митинг восьтігӧн музыка ворсіс «Интернационал». Чолӧмбыттьӧ висьталісны обласьтса представительяс да ас вӧлӧсьтувса общественнӧй организацияясысь. Тайӧ лунас тыри во Айкинаса электричество лӧсьӧдан тӧварищество воссьӧмлы. Уджыс тыдалӧмӧн нин тыдалӧ: Айкинаын, Шожымын да Дзоля Айкатылаын югыд би ӧзйӧ. Тайӧ лунас тшӧтш «Нянь воӧм (урожай) праздник» дай с.-к. выставка вӧлі. Обласьтысь волісны нарошнӧ представительяс (музыкаӧн). Митинг эштӧм бӧрын став йӧзыс муніс видзӧдлыны электричествоӧн вартӧм: ид кӧть рудзӧг зэв бура вартӧ; ёна и дивуйтчисны крестьяна, шуалӧны: оз пӧ тай ков чап, дай идзасыс пӧ кутшӧм небыд петӧ.

7 часын рытын вӧлі торжественнӧй заседанньӧ; сэтӧн сетісны электричество лӧсьӧдан тӧвариществолы ним — «Югыд Кодзув». Сэсся вӧлі спектак. Пуктім роч пьеса «Земля — наша мать, давай хозяйство поднимать». Лэдзим тайӧ праздник кежлӧ стенса газет. Обласьтувса учрежденньӧяс ёна отсалісны праздник коллявны. Водзӧ тадзи жӧ колӧ отсавны обласьтсянь деревняясыдлы.

Ми чайтам, Айкатыла татчӧ оз на сувт, водзӧ на мунас: «Тайӧ сӧмын на дзоридзыс, вотӧсыс водзын на». Электричество лӧсьӧдан тӧварищество чорыдджыка на босьтчас уджавны водзӧ.

Айкатыласа! Бисӧ кӧ ӧзтінныд, помӧдзыс нуӧдӧ — электричествоӧн кокньӧдӧй ассьыныд уджнытӧ!

А. Лютоев.