АЙКИНАСА С.-К. ВЫСТАВКА

Сентябр 22 лунӧ вӧлі лӧсьӧдӧма сельскокӧзяйственнӧй выставка. Крестьяна первойысь вайисны выставка вылӧ асланыс кӧзяйствоӧн вӧчӧм кӧлуй мӧда-мӧдыслы петкӧдлыны: кутшӧм бура позьӧ быдтыны скӧтӧс, пуктасъяс. Медся уна крестьяналӧн вӧлі вайӧма экспонатъяс (петкӧдлантор) град выв пуктасъяс — турнепс, вӧлі шабді дас кымын пӧлӧс. Вӧліны порсьяс, мукӧдыс веситӧ пуд 10 кымын. Крестьяна эз на бура гӧгӧрвоны, кутшӧм экспонатъяс колӧ петкӧдлыны: этша вӧлі мӧс да вӧв да мукӧд скӧт. Медся ёна колӧ, дай позьӧ, регыдӧн кыпӧдны скӧт вӧдитӧм (скотоводство) миян местаын. Уна йӧз выставка пыр петіс, морт 400 видзӧдліс да кывзіс агрономъяслысь висьталӧм. Крестьяна видзӧдлісны быдсяма машинаяс: кӧдзан, шабді няръялан да мукӧд пӧлӧс, ёна и сьӧлӧм вылас воис: аттӧ дивӧ, кутшӧм бура вермӧ шабдітӧ няръявны, колӧ пӧ заводитны артельӧн лӧсьӧдавны машинаяссӧ! — шуӧны крестьяна. Машинаяскӧд орччӧн вӧлі важ гӧр пуктӧма тшӧтш — тайӧ пӧ тай выль кӧлуй дінад нинӧм оз сулав, — шуӧны.

Тайӧ выставка бӧрын рытнас премияяс сеталісны. Уземуправленньӧ лэдзис премия вылӧ комын шайт. Премия сетісны кызь крестьяналы.

Крестьяналы ёна сьӧлӧм вылас воис выставкаыд. Мӧд во пӧ бурджыка лӧсьӧдам, — шуӧны найӧ. Сэки жӧ, рытнас, лӧсьӧдім с.-к. кружок, пырис нин 25 морт крестьяна пиысь.

Айкатыла мунӧ нин водзӧ мукӧд вӧлӧсьтъяс серти. Мукӧд вӧлӧсьтъяс, вӧтчӧй Айкатыла бӧрся, энӧ кольччӧй наысь!

Айкатыласа крестьяна, мӧд во кежлӧ нӧшта чорыда кутчысьӧй уджавны! мӧд во мед татшӧм выставкаыд зэв ыджыд да бур вӧлі.

А. Лютоев.