А. Ӧ. СУКАНОВА ГУ ВЫЛЫН

Сентябрын 15-ӧд лунӧ Мӧскуаын дзебим (гуалім) коми литература вылын уджалысь мортӧс, А. Ӧ. Сукановаӧс. Агния Ӧндреевна висьмытӧдзыс на вӧлі шулывлас: «Менӧ пӧ бара, кула да, коми сьыланкывйӧн дзебӧй». Тайӧ кывъяссӧ меным шуліс сійӧ буретш сэки, кор миянӧс, коми гижӧд лӧсьӧдысьясӧс, зэв ёна вӧлі кедзовтӧны. Сэки Коми Нига Лэдзанінӧс шуисны дзикӧдз тупкыны (сократитны). Со ӧд кутшӧм ковтӧмӧсь да мустӧмӧсь вӧлім! Но Коми Нига Лэдзанінса уджалысьясыс кольччисны уджавны прӧста (жалӧванньӧтӧг). Сідзикӧн, сэки эз вермыны дугӧдны коми нига лэдзӧм. Агния Ӧндреевна сэки медпервой шыасис: мед пӧ миянлы нинӧм кӧ оз мынтыны, коми гижӧд лӧсьӧдӧмысь пӧ огӧ дугдӧй. Дерт, Агния Ӧндреевна оз на вӧлі сэки кӧсйы кувны: ёна на вӧлі кӧсйӧ уджавны, да эз и чайтлы Мӧскуаын кувны... Да он тай тӧд нинӧм...

Кыдзи вермим ми зілим сійӧс комиӧн нин дзебны. Яндзим вӧлі сійӧс эськӧ не коминас дзебныс — сійӧ ныр вылас усьтӧдз пессис коми йӧзӧс ас кывйӧн югдӧдӧм понда!

Коми студентъяс лӧсьӧдісны хор. Медалӧма вӧлі музыка. Сэсся гу дорӧдзыс колльӧдім музыкаӧн да коми сьыланкывъясӧн. Тӧдсаясыс гу вылас комиӧн висьталісны кывъяс (речи). Найӧ, олӧм йывсьыс висьталӧм бӧрын, шуисны: ӧні пӧ медколан удж — зыранизация. Тӧв. Суканова пӧ тайӧ удж вылас зэв нин дыр уджаліс. Кулі пӧ, кор пӧ сылӧн уджыс медъёна вӧлі колӧ. Ми пӧ, велӧдчӧм йӧз, кӧсйысям тайӧ ужсӧ нуӧдны водзӧ.

Сэсся тыртім Агния Ӧндреевналысь гусӧ коми сьыланкывъяс сьылігтырйи. Гу вылас сувтӧдім сюръя. Сюръя вылас тувъявны кӧсъям татшӧм гижӧда пӧв (жӧч):

«Тані куйлӧ коми гижӧд понда пессьысь морт АГНИЯ ӦНДРЕЕВНА СУКАНОВА (чужліс 1884 воын, кулі 1925 воын, сентябр 13-ӧд лунӧ).

Узь жӧ тані, ёртӧй, йӧз муын. Тэ кулін уджалысь коми йӧз понда. Тэнад дона Коми муыд тасянь зэв ылын... Но тэнад сьӧлӧмсяньыд гижӧм гижӧдъясыд, мудз тӧдтӧг уджалӧмыд пыр лоӧ коми йӧз пӧвстын. Коми йӧз тэнӧ оз вунӧд.

Коми ёртъяс».

Медбӧръя куим вонас миян быри куим коми гижысь: Ф. В. Попов, И. Т. Чисталёв да А. Ӧ. Суканова. Коді найӧс кӧть ичӧтика тӧдӧ вӧлі, быдсӧн нин шуасны: куліны пӧ найӧ коми культура понда вывті зіля уджалӧмысла.